Nagtakoban nga pagbati

 Gula 73

Unya misaka siya sa balay. Miadto sa kusina ug nagkuha og bungay. Pagbalik niya sa tugkaran sa balay, iyang giguna ang mitubo nga mga sagbot sa palibot.

Tungod kay ang iyang konsentrasyon didto ra sa iyang gibuhat, si Denia wala makamatikod sa pag-abot sa usa ka lalaki nga nahimutang sa tugkaran sa ilang balay.

“M-maayong palis...”

Naigking si Denia sa pagkadungog sa sinati na niyang tingog. Sa iyang paglingi, iyang nasuta nga wala gayod siya masayop sa iyang pangagpas. Si Jonas ang tag-iya sa tingog nga iyang nadungog.

Nakugang pag-ayo si Denia wala siya magdahom nga motungha si Jonas karon sa ilang pinuy-anan.

Misantop kadto sa iyang hunahuna nga likayan niya si Jonas apan nausab ang iyang hukom. Nareyalisar niya nga dili maayong likayan niya ang lalaki kun wala kini daotang tuyo kaniya. Gawas pa ania sila sa kaugalingon niyang tugkaran. Bisan minyo na si Jonas apan angay gihapon niya kining respetahan kun walay malisya ang tuyo niini kaniya.

Aron magkasulti sila’g maayo, gidala niya si Jonas ngadto sa ilawom sa landong sa dakong punoan sa kaymito diin may nahimutang nga lingkoran ang tiunay. Nagpabilin nga nagbarog si Denia. Si Jonas ray iyang gipalingkod. -- Sumpayan pa