Gimulto ko si Rino

Sa sinugdanan, hinay ang akong pagtuktok sa pultahan sa sala sa usa ka apartment sa hilit nga dapit sa siyudad. Wa koy namatikdang tawo sa sulod. Gipakusgan ko ang pagtuktok. Sunud-sunod. Ug nagkakusog pa gyod. May kasikas kong nadungog sa sulod, morag sinagadsad sa sinilas.

Inanay nga mihulma sa akong nawong ang pahiyom. Ug unya, morag misaka sa akong ulo ang dugo sa kaligutgot. Nawagtang ang akong pahiyom. Maoy mipuli ang kasilag.

Naabli ang pultahan. Naniga ang mga mata sa usa ka lalaki, 30 ang edad, ambongan ug macho, nga maoy nagbukas sa pultahan, pagkakita niya nako.

"Dili! Dili ikaw si Rita! Patay ka na!"

Milagubo ang pultahan sa sala nga gilamba sa pagtak-op sa lalaki. Nadungog ko ang nagdaling mga tunob sa sulod, nagpalayo sa sala, morag nagdagan. Nahadlok.

Nagpabilin ko sa akong gitindogan. Naabli ang akong hunahuna sa usa ka hitabo, usa ka bulan na ang milabay.

"Rita! Nganong nahitabo kini nimo? Ngano?"

Migakos ko sa lungon nga nahimutangan sa akong kaluha pag-abot na niya sa among dapit sa Ormoc gikan sa Cebu. Sa Cebu nagtungha si Rita. Nagkuhag Hotel and Restaurant Management. Samtang ako, sa Ormoc nag-eskuyla sa kursong Commerce.

Nalubong na lang si Rita, wa gyod madakpi ang kriminal. Gilugos si Rita sa iyang hinigugma, ug pagkahuman, gipatay. Way nasayod kun hain magtago ang mamumuno.

Natawo ang usa ka panganti. Panimalos ang gisinggit sa akong hunahuna.

Pag-antos ug sakripisyo. Taas-taas nga panahon ang akong gigahin. Miundang ko sa pagtungha tungod sa usa ka tinguha. Kahatagan og hustisya ang nahitabo sa akong kaluha.

Ug wala ko mapakyas. Natultolan gyod nako ang gipuy-an sa kriminal nga hinigugma sa akong kaluha. Daghan kong impormasyon nga nasayran bahin kaniya. Rapist diay siya. Kanunay makaikyas sa balaod kay abtik ug daghan og koneksiyon nga mga opisyal sa kapolisan. Usa sab siya ka drug pusher ug drug dependent.

Sagbot siya sa katilingban! Ug karon, panahon na nga lukaon siya sa iyang pagka daotan.

Giliso ko ang door knob. Wa ma-lock. Sa pagdinali tingali niya tungod sa kalisang. Misulod ko. Nakita ko siya nga miluklok sa suok sa sulod sa iyang lawak.

"Patay ka na, Rita! Di mahitabong mabuhi ka! Gidunggab tika sa makadaghan ug gitambog pa gyod sa dagat!"

"Salbahis ka, Rino. Hayop!" Naminti ko. Naniga ang akong mga mata sa tumang kasuko. Ug sa panan-aw ni Rino, usa ako ka multo.

"P-Pasayloa ako, Rita! Maluoy ka! Ikaw man god, di gyod motugyan sa imong lawas nako nga girlfriend man unta ka nako. Maong napugos ko sa paglugos nimo. Pasayloa intawon ko, Rita!"

Mikurog ang tingog ni Rino. Nakahilak siya sa kahadlok. Nag-anam ko sa pagpaduol kaniya. Nangluspad siya pag-ayo. Mitindog siya. Ug kalit nga miambak sa bentana sa iyang lawak. Nagtakiang siyang midagan. Nakita ko kaayo ang kusog nga dagan sa usa ka sakyanan. Nakapiyong ko dihang maayong pagkasabak ni Rino sa dulong sa sakyanan. Pagbuka ko sa akong mga mata, nagbuy-od na siya sa karsada, naglunang sa dugo. Maayong pagkabuak ang iyang ulo.

Miluag ang akong dughan. (Kataposan)