Nagtakoban nga pagbati

 Gula 70

Pagkabuntag sayong mibangon si Denia. Mibalik na siya sa naandan niyang bulohaton sa balay sa wala pa siya moadto sa Cebu. Naghikay siya’g pamahaw alang sa tulo niya ka manghod nga mo-eskuyla.

Ang ilang mga ginikanan kaadlawon pang mibiya sa ilang pinuy-anan. Paingon sa lungsod. Sa sentro sa lungsod sa Guindulman nanginabuhi ang ilang amahan ug inahan pinaagi sa pagpamaligya og mga pagkaon. Mosugat sila sa mga sakyanan nga mohunong sa merkado sa lungsod aron pagtanyag sa ilang mga baligya ngadto sa mga pasahero.

Matag gabii human sa panihapon, hikayon nang daan sa ilang mga ginikanan ang igtitinda nga mga pagkaon sama sa bibingka ug puto. Sagad hapit na ang alas dose sa tungang gabii nga mahuman sila sa pagluto sa ibaligya nga mga pagkaon. Unya momata sila’g sayo inigkakaadlawon aron motugbong sa lungsod. Kapoy kaayo ang ilang trabaho. Sagad gabii na silang mahiuli.

Mao na kini ang panginabuhi sa ilang mga ginikanan sukad sa bata pa si Denia. Panginabuhi nga pinobre. Usahay gani ang ilang kinitaan dili makadispaser sa panginahanglan sa pamilya. Labina karon nga pulos na nagtungha ang iyang mga manghod sa hayiskol ug elementarya.

Sanglit siya’y kamaguwangan, si Denia ang nahimong katimbang sa iyang mga ginikanan sa mga bulohaton. Wala gani siya makatiwas og eskuyla sa hayiskol. Gipalabi na lang niya ngadto sa iyang mga manghod ang pag-eskuyla ug siya miabag sa ilang mga ginikanan. -- Sumpayan pa