Oras mo na, Rey Corpuz!

 Gula 40

Tsug! Tsug! Tsug! Tsug! Tsug!

Hingigo kaayo si Rey Corpuz. Walay mga bala nga gibuga gikan sa iyang armas nga nausik. Pulos gayod kini nakaigo og kaaway.

Bisan og may silencer ang armas ni Rey, namatikdan gyud ang iyang pagsulod sa maong dapit. Kaha tungod sa takandal nga mabati sa higayon nga mohagsa sa salog ang mga kaaway nga iyang gipamusil.

Ang nakamatikod kang Rey mao ang lider sa Jehaddah Sellamiah nga iyang gipangita -- si Abaddon. Migawas kini sa lawak nga nahimutangan niini. Pagkakita niini kang Rey, gipusil siya niini. Maayo gani kay nakadali pagligid sa salog si Rey ug nakalikay siya sa mga bala.

Nakita ni Rey nga midali pagbalik og sulod si Abaddon sa lawak niini. Midali sab pagbarog si Rey ug mipaduol sa lawak nga nahimutangan ni Abaddon. Gitindakan niya ang pultahan.

Bang! Bang! Bang!

Gipusil si Rey ni Abaddon nga didto sa sulod sa lawak. Midali pag-ipli si Rey aron dili maigo. Unya mibalos siya pagpusil ngadto kang Abaddon. Apan wala kini niya maigo. Nakita kining midali kini’g sulod sa usa ka closet sulod sa lawak niini.

Mainampingon nga mipaduol si Rey sa closet. Iyang nasuta nga may hagdanan diay didto sa maong dapit. Ug nakita niya si Abaddon nga paspas kaayong mikanaog sa hagdanan.

Tsug! Tsug! Tsug!

 Gipusil niya si Abaddon apan wala kini maigo.

   Gigukod ni Rey si Abaddon agi sa hagdanan nga mao say giagian niini. Pero paghimuntog niya sa ubos nga bahin sa hagdanan, wala na niya makita si Abaddon.

Bang!

   May mipusil ni Rey. Ug kay hayag man ang palibot tungod sa sugang dagitabnon, nakita niya nga si Abaddon ang mipusil kaniya. Midali kini pagdagan paingon sa luyo sa bodega.

Midali pag-agpas si Rey. Pag-abot niya sa luyo sa bodega, iyang natukmaan ang dakong hawan diin adunay firing range.

Unya, may kasikas nga nabati si Rey gikan sa iyang luyo. Midali siya pagbakyaw sa iyang kamot nga naggunit og armas aron pusilon ang tawo nga nagmugna sa maong kasikas. -- Sumpayan pa