Ang tambaluslos sa katunggan

Bisan udtong larok na, nagtikawtikaw lang gihapon si Ruel diha sa may katunggan aron pagpanguot og mga alimango diha sa ilawom sa mga kabakhawan ug kapatpatan.

Didto man lang unta kadto siya sa may kalapukan aron sa pagpanikop og mga isdang Bugo, apan kay mitaob naman ang dagat maong mibalhin siya didto sa may katunggan.

Ang tuyo na sab niya didto mao ang pagpanguot og mga alimango, diha sa mga sukabsukab, sa ilawom sa mga kabakhawan ug kapagatpatan. Nahigam man gud siya kay nakakuha man siya og mga alimango sa milabay nga adlaw, didto gihapong dapita.

Samtang nagsige siya’g tuwadtuwad aron sa pagpanguot og mga alimango, kalit lang nga dunay mitimpasaw diha sa duol ni Ruel. Mora’g giitsa gikan sa layo.

Tungod kay nagtuo man si Ruel nga duna lang tingali nagkomedya og labaylabay kaniya, wala lang niya kini panumbalinga, ug nagpadayon siya sa iyang gibuhat.

Wala na usab madugay, duna na say naglabay kaniya.Ug sa iyang pangagpas, bato ang gilabay. Napikas pa gani sa tubig ang iyang nawong, kay diha man gyud sa iyang duol kini motugpa. Unya, kadtong maong paglabay, gisundan pa gayud og lain.

Ning tungora, mihunong na gayud si Ruel sa iyang gibuhat. Gipaliraw niya ang iyang mga mata sa tibuok palibot aron gayud pagtino kun kinsa gayud ang milabay kaniya. Apan wala gayud siya’y nakitang tawo. Hinuon, iyang namatngonan nga mora’g milihok ang mga dahon sa kahoy didto sa unahang dapit gikan sa iyang nahimutangan. Mora’g giuyog kinig tawo, o mga tawo ba kaha.

Nakapangutana si Ruel sa iyang kaugalingon, kun kinsa gayud kaha kining nagkomedya kaniya. Nakaingon hinuon siya, nga duna pa diay laing tawo ang nagtikawtikaw niadtong dapita gawas kaniya, niadtong mga orasa.

Kay nagtuo man si Ruel nga gikomedyahan lang siya, mao nga mibawos usab siya og pangkomedya, pinaagi sa pagsinggit nga nagkanayon, "Pakita ra gud og suway, kay dila ra gayud ang walay labod kanimo!"

Human og singgit ni Ruel niadto, namatngonan na lang niya nga mora’g nangaharos ang mga dahon sa kahoy. Daw naagian kinig kusog kaayong hangin. Ug morag dunay mikasa.

Ning higayona, kanunay nang nagmabinantayon si Ruel. Wala na gyud niya ibuwag ang iyang mata, sa dapit diin magagikan ang kasa.

Unya, kalit lang nga misiga ang mga mata ni Ruel, sa dihang may mibutho diha sa iyang atubangan. Usa kini ka linalang, nga dili sama kanato. Ug sukad masukad kadto pa gayud niya makita.

Ngil-ad kaayo og hitsura ang mibutho diha sa iyang   atubangan. Kay gawas nga siga kaayo kinig mga mata, baga pa kaayo kini og mga ngabil, ug hilabihan ka puwa.

Ning tungora, miabot na og kahadlok si Ruel. Dili man gud usa ka ordinaryong tawo lang ang mipakita karon kaniya. Talagsaon man kaayo kining pagka-linalang, nga makahahadlok kaayong tan-awon.

Misamot pa gayud ang kahadlok ni Ruel, sa dihang mingisi na kini. Kay sa pagngisi niini, nag-anam man usab kawalis ang mga ngabil niini, hangtud nga naluslos kini pag-ayo.

Wa na maghuwat og lain pang higayon si Ruel. Midali siya’g palayo niadtong dapita, pinaagi sa pag-ubog sa tubig, paingon na sa may lapyahan. (Kataposan)