“Way kalabotan sa akong desisyon pagbiya niining ba'ya ang gipanagsultihan namo ni James, Nang,” gipintok ni Denia ang iyang tubag aron dili na modugang sa pagpangutikuti ang lagas.
“Pag-ayoayo, Inday,” mao ray gikasulti ni Nang Luding.
“Ikaw sab, Nang,” ni Denia. “Pag-ayo-ayo sa imong trabaho dinhi.”
Managsamang emosyonal sila si Denia ug Nang Luding.
Human sa panamilitay, mibiya dayon si Denia sa panimalay sa mga Ricarte. Samtang nagsakay siya’g PUJ paingon sa downtown, wala niya kapugngi ang paglingi ngadto sa nagbuntaog nga panimalay sa iyang mga agalon nga na'g-anam nag kalayo sa iyang panan-aw.
Gitupsan ang iyang balatian sa kahinugon samtang naglantaw sa maong balay.
Pag-abot niya sa downtown, misakay siya’g laing PUJ paingon sa Pier 3. Wala siya maglisod kay gibasa man niya ang signboard sa mga sakyanan nga moagi sa iyang tungod aron pagsuta kun unsa ang rota niini.
Tayming gayod nga sa iyang pag-abot sa pier, dihay barko nga hapit na molarga paingon sa Tubigon. Puyde siyang mosakay sa maong barko. Kun tua na siya sa Bohol dili na siya masaag. Gikan sa Tubigon mosakay siya’g bus paingon sa dakbayan sa Tagbilaran diin adto na usab siya mosakay og laing bus paingon sa ilang lungsod sa Guindulman.
Nagdali-dali siya'g lukat og ticket. Igo lang siyang nakaluwan sa barko, gihipos na ang damyo.Milarga na ang barko. -- Sumpayan pa