Nakapangigham kay gilamian

Wa gayod buwagi og tan-aw ni Uray Imak, ang iyang bugtong anak nga dalagang guwang, nga gisinyasan na ni Pikto, nga pasudlon og una sa kuwarto.

Sa hunahuna ni Uray Imak, nga karong gabhiona, nahuman na ang kasal ni Oprit kang Pikto, seguro gayod nga matagamtaman sa iyang anak nga dalagang guwang unsa ka lunlon nga bation, sa usa ka babaye, ilabi na kang Oprit...nga sukad masukad sa iyang kabatan-on kanhi... wa gayod makatilaw!

Dili pa lang sa kahigpit sa imong pagka-inahan Nay Imak, maminyo unta ako og sayo!” ni Oprit pa nga may tuno sa pagmahay ang iyang sinultihan.

“Tan-awa naminyo ako kang Pikto, nga gahi na kaayo ang tul-an ug dili na madali nga lat-an!”

Igo na lang nagpatulo sa luha si Uray Imak, nga gimahayan siya sa iyang bugtong anak nga dalagang guwang. Insakto baya sad ang giingon kaniya ni Oprit, unsaon nga sa buhi pa si anhing Igong, hilabihan man ka seloso kun adunay mga kaulitawhan nga mamisita kang Oprit. Maglumbaanay god og panagan, ilabi na kun ibton na gikan sa sakoban ni anhing Igong, ning ilang dapit sa balangay sa Sangi.

“Oras na mahal kong asawa nga Oprit, nga manulod kitang duha sa kuwarto!” kalit lang nahagtos ang kahalawom sa paghanduraw ni Uray Imak, nga nakayanghag nga giagbayan na ang iyang anak nga dalagang guwang ni Pikto.

“Pag-ayo-ayo na lang kamong duna Pikto ug Oprit, ug ayaw gayod kamo intawon pagpalabi sa inyong gibati karong gabhiona!” dihay pabawon nga tugon ni Uray Imak sa bag-ong magtiayon.

Wa pa lang gani makapiyong si Uray Imak, sa iyang mga mata...ingon na siya og katumbahon. Nalipong siya ug kasukaon.

Wa man untay hangin...apan ngano man nga hilabihan man nakauyog ang dapit sa may kuwarto nga gihigdaan sa bag-ong magtiayon?

Dili gani siya hapit makabarog, aron tan-awon ang gawas sa iyang balay, kun may bagyo ba nga milampornas sa ilang dapit?

Linaw man ang kinaiyahan ug namituon man gani ang kalangitan? Takulahaw may nadunggan siya nga sunod-sunod nga pangigham gikan kang Oprit nga nagkanayon:

“Ambot ug ngano sad akong mahal nga Pikto...nga makapangigham man ako sa kalami?” (Kataposan)