Oras mo na, Rey Corpuz!

Gula 33

Naghinuktok sa makadiyot si Rey Corpuz. Alang niya, lisod kaayong balibaran si Vonna. Pero gihunahuna sab niya ang mas dako niyang misyon -- nga wala pa niya matuman sa hingpit -- ang pagdakop sa lider sa Jehaddah Sellamiah nga nagmugnag kasamok sa Sugbu.

Pipila na lang ka adlaw ug magsugod na ang ASTO Summit. Kinahanglan nga madakpan na niya si Abaddon sa dili pa magsugod ang maong kalihokan.

Ug si Vonna nagkinahanglan sab sa iyang tabang -- sa iyang serbisyo. Maakos pa ba kaha sa iyang lawas kun duha ka misyon ang isangon niya sa iyang kaugalingon sa samang panahon?

“Ikahatag mo ba kanako ang pabor nga akong gipangayo, Rey?” Gikan ni Vonna.

“Dili ba nagpadayon man ang kapolisan sa paghimog imbestigasyon bahin sa kamatayon sa imong amahan hangtod karon?” sumbalik pangutana ni Rey Corpuz.

“Kuwang ko’g pagsalig sa ilang imbestigasyon, Rey. Gusto kong ikaw ang mo-imbestigar sa kamatayon ni Daddy. Ako’y bahala nimo.”

Nahilom sa makadiyot si Rey. Gipamalandongan niya ang gisulti ni Vonna. Gitimbangtimbang kini niya’g maayo.

“Ayaw ko’g balibari, Rey,” ni Vonna pa.

“Sige,” ni Rey pa. “Tabangan tikaw. Mohimo ko’g linain nga imbestigasyon bahin sa kamatayon sa imong amahan.”“Salamat, Rey. Salamat.”

Tungod ba kaha sa sobrang kahinangop ni Vonna, gigakos ug gihagkan niini ang ngabil ni Rey. Hangtod nga napukaw ang kainit sa tagsatagsa nila ka lawas. Sa makausa pa, gisaw-an nila ang kalalim sa lawasnong kalipay diha sa mainiton nilang pagtagay.

Sukad niadto, si Rey naingon sa usa ka bata nga nakagunit og tirador ug nagtinguha nga makaigo og duha ka langgam pinaagi sa usa lang ka bato. Kay gawas sa dako niyang misyon nga mao ang pagsikop ni Abaddon, iya sab nga gipangitaan og paagi nga makabaton og hustisya ang kamatayon sa amahan ni Vonna nga si Cong. Jovito Lazaro.

Usa ka gabii niana, sa pagpauli ni Rey gikan sa presinto sa kapolisan diin siya nanghagdaw og dugang kasayoran, nakamatikod siyang may sakyanan nga nagsunod sa iyang awto nga gipangunayan niya pagmaneho. -- Sumpayan pa