Oras mo na, Rey Corpuz!

Gula 32

Nangayog katin-awan si Rey Corpuz gikan kang Vonna kun nganong gitugyan niini kaniya ang pagka-babaye niini sa dakong kasayon, sa walay bisan unsang kondisyon o kaha kasabotan.

“Tulo ka katarongan, Rey,” ni Vonna pa. “Tulo ka katarongan.”

“U-unsa ang maong mga katarongan?” Pakitubod ni Rey.

“Una, type nako ang imong suave image.”

“U-unsa?”

“Usa ikaw ka celebrated spy, Rey. Wa pa ta magkahimamat nakadungog na ko sa imong ngalan. Nabaniog ka tungod sa dagkong mga kaso dinhi sa Sugbu nga imong nasulbad. Nakita ko na ikaw sa TV ug mga pamantalaan. Pero mas na-attract ko nimo dihang nakita ko ikaw sa personal didto sa hospital.”

Wala motingog si Rey. Wala siya masayod kun unsay i-display niyang reaksiyon sa gipadayag ni Vonna sa iyang atubangan.

“Ang ikaduhang katarongan, Rey,” ni Vonna pa, “mao nga gusto kong motilaw og himaya sa usa ka lalaki sa dili pa ko mamatay.”

“Saba diha, uy.” nakaingon si Rey.

“Alang nimo dili tingali big deal ang maong katarongan, Rey. But I’m serious about it. Kamatuoran niini mao nga gibuhat nako ang dili unta angay buhaton sa usa ka babaye, labina sa sama nako nga usa ka propesyonal.”

“Ngano bang naghisgot ka na man og kamatayon?”

“Tungod sa katingad-ang mga tawo nga naglibotlibot ning balay kaganina. Nagtuo kong daotan gyud sila’g tuyo nako. Maong gusto kong sa dili pa ko nila patyon, di na ko magmahay sa kalibotan... kay natilawan ko na man ang angay kong matilawan.”

Ug mikatawa si Vonna. Pero kadali ra siyang mibalik sa kaseryoso.

“Ang ikatulong katarongan, Rey,” matud ni Vonna, “nganong gitugyan ko kanimo ang akong kaputli, mao nga sa ingon dili ka makabalibad sa pabor nga akong pangayoon kanimo.”

“U-unsa ang maong pabor, Vonna?” Nakapangutana si Rey.

“Tabangi ko nga mahatagan og hustisya ang kamatayon ni Daddy,” seryoso kaayo ang pamunto sa sinultihan ni Vonna. -- Sumpayan pa