Ang gitomar ni Mar

Hilabihang lipaya ni Mar sa dihang nakit-an ra gayud niya ang gamay'ng garapa nga gihatag kaniya ni Israel. Si Israel maoy silingan ni Mar sa barangay Kabangkalan, probinsiya sa Negros, diin atua niya gipapuyo ang iyang asawang si Joy. Ania magtrabaho si Mar sa dakbayan sa Lapulapu ug matag tapos sa bulan lang niya duawon si Joy sa ilang dapit sa Negros. Mao nga dili kalikayan ni Mar, matag gabii abuton siya'g kalaay ug tumang kamingaw nga maghunahuna sa pinanggang asawa ug mga anak.

Morag nabatyagan niya nga nawala ang kanhi niyang kapiskay sa lawas diha sa pagpanarbaho. Kun mahimo pa lamang, gusto niyang duawon kanunay matag adlaw o matag semana ang namingawan niyang asawa.

Nasuya ug naibog siya sa kahimtang ni Israel, nga halos matag adlaw ug kada semana, yanohon lang sa pagtaboktabok ang Negros ug Sugbu. Hinuon, usa ka negosyante si Israel ug way problema niini ang pamilite sa lantsa sa iyang pagbalikbalik og biyahe sa Cebu ug Negros.

"O, imna kining tambal sa sulod ning gamay'ng garapa, Bay Mar! Oil ni! Makapalagsik ni sa lawas ug seguradong masulbad ang imong kamingaw kang Joy....!" nakatawa si Israel sa dihang nagkakita sila si Mar sa city hall sa dakbayan sa Lapulapu, kay duna kini transaksiyon sa sulod sa city hall.

Usa ka regular clerk sa city hall sa Lapulapu si Mar nga gibangkelyahan niya sa iyang pagka-freelance writer sa nagkalainlaing tabloid sa Sugbo.

"Mao ba? Salamat kaayo, Bay Rael, ha....?" ni Mar nga hilabihang lipaya nga midawat sa gamay'ng garapa nga gihatag kaniya ni Israel.

Ug ning gabhiona, hilabihang nakapangita ni Mar sa maong gamay'ng garapa nga hinatag ni Israel kaniya, kay nawani niya sa pagbutang sa boarding house nga giistaran. Nanaginting pa sa iyang kaisipan ang gisulti sa higalang negosyante sa Negros. "Makapalagsik ug makasulbad sa imong kamingaw kang Joy kun imong tomaron ang sulod sa maong gamay'ng garapa...!"

Mapahiyumon nga gitutokan ni Mar ang gikuptang gamay'ng garapa. Giukban. Ug gihurot og inom ang lana sa sulod sa garapa. Dagko og lad-ok ang tutonlan ni Mar nga mitulon niini. Gipamatyag dayon niini ang epekto sa iyang gitomar ning gabhiona. Ug....

Kalit nga nausab ang pamayhon ni Mar. Misulbong ang kaputol niyang lawas gikan sa lawak sa boarding house nga iyang giistaran. Gitugkan siyag pako! Nahimo siyang anananggal!

"Wakkkk.....! Wakkkkk.....!" misulbong sa kinaibabwan ang langis nga tingog ni Mar nga paspas kaayong milupad.

"Ahaka ni Bay Israel, uy! Gipatakdan man diay ko sa iyang pagka-ungo! Mao diay nga masulbad ang akong kamingaw kang Joy ug sa akong mga anak kun matomar ko ang sulod sa gamay'ng garapa, kay maduaw ko naman karong gabhiona ang akong asawa! Yahooooo....! Wakkk! Wakkk!"

Ug hilabihang lipaya ni Mar nga paspas nga milupad didto sa kahitas-an, latas sa madulom nga kagabhion, paingon sa barangay Kabangkalan sa Negros. Nasayod siya nga makurat ang iyang asawa inigkakita kaniya, apan malipay sab si Joy sa wa damhang pag-abot niya sa ilang balay ning gabhiona. Ug gipahimuslan ni Mar nga epekto sa iyang gitomar pinaagi sa pagbulhot sa kusog niyang tingog.

"Wakkkkk.....! Wakkkkk.....!" (Kataposan)