From a distance

Nakita ko na sab ang akong prince charming didto sa layo. Nagpaantaw lang ang karaho nako. Ug kun akong tutokan, molingiw. Torpe man diay tawhana. Makuha niya ako sa "tingin"? Unsay pagtuo niya nako, cheap?

Wa na nuon magkadimao ang akong pag-research sa library sa unibersidad nga akong gitunghaan. Morag gisunod-sunod ako ning tawhana, da! Bagutbot ko sa hilom. Matag higayon god nga mosulod ko sa library, naa sab siya. Apan adto sa layo molingkod. Maglantaw nako. Guwapo ra ba unta apan hadlokan.

"Hoy! Naunsa ka nga nagyawyaw man nga mao rang usa?"

Napakgang ang dagan sa akong hunahuna sa pagsiko og hinay ni Loren, akong klasmet sa Biology. Managsama kaming nag-research niadtong tungora.

"Da, ang akong secret love, di makamaong mo-speaking. Nagtuo tingali nga sugton ko siya sa pagtan-aw-tan-aw lang niya nako."

Mitukiki’g katawa si Loren.

"Haayyy. Ang gugma. Puno gyod sa suspense."

Gisigahan ko sa mata si Loren. Unya gitudlo ko ang dakong karatula sa sulod sa library: SILENCE PLEASE." Nahilom ang akong amiga.

"Nakaila ko niya, Lerma."

Gihunghongan ko sa akong amiga. Nakunot gud ang akong agtang kay wa ko makatuo sa iyang gisulti.

"Kaila god tawon. Kinsa man na siya, bi?"

"Si Dondon!"

"Aw, Dondon man kaha. Di ko interesado niya, uy!" Gilimdan ko si Loren. Apan ang tinuod, nakagusto ko sa giingon niyang Dondon. Unsaon, cute man siya alang nako.

Usa ka gabii, nagpahayahay ko sa among terrace sa bungalow type namong balay sa M.J. Cuenco. Nahasiga ang akong mga mata kay didto sa gawas sa among gate, nagtindog si Dondon. Naglantaw nako. Nagdali kong miduol kaniya.

"Hoy! Nag-unsa ka dinhi? Basig makita ka ni Papa nga usa ka polis ug magtuo nga kawatan ka! Mapusilan ka nga di oras!"

"I-Ikaw ang akong tuyo, Lerma."

Mitukiki ko’g katawa kay mikurog pag-ayo ang tingog ni Dondon. Taslakan gyod og babaye, hilom akong nakaingon sa akong kaugalingon. Gipasulod ko siya. Nag-estoryahay kami sa among sala.

"Nganong nakatultol ka sa akong gipuy-an, Don? Labaw sa tanan, nganong nasayod ka sa akong ngalan?

"Si Loren ang nagsulti nako."

"H-ha? Si Loren?" Puwerte nakong kuganga. "Ngano, ig-unsa nimo si Loren?"

"Akong cousin."

Pilya gyong bayhana, bagutbot ko sa hilom. Wa gyod magsulti nga mag-agaw diay sila si Dondon.

Kadto mao lamay sinugdanan sa tanan. Usa ka sinugdanan nga misangpot sa among panaghigugmaay ni Dondon. Buotan man diay ang karaho. Faithful pa gyod nako. Caring.

"Unsa na, Lerma, belib ka na kang Dondon?"

Gisiko ko’g hinay ang kilid ni Loren. Diha kami sa library. Apan wa ko motubag kaniya kay nakita ko si Dondon nga misulod sa library ug didto molingkod sa layo. Naglantaw nako. Torpe gyod! matud ko sa hilom. Apan nagpahiyom ko. Gibiyaan ko si Loren ug giduol ko si Dondon. Nagpahiyom kami sa usa’g- usa. (Kataposan)