Oras mo na, Rey Corpuz!

 Gula 28

Misulod sila si Rey ug Vonna sa balay. Paghimuntog nila sa sala, milirawliraw ang mga mata ni Rey. Luho ug hamugaway ang balay nga gipuy-an ni Vonna. Kompleto sa mga kahimanan.

“Ikaw rang usa ang nagpuyo dinhi?” Nakapangutana si Rey.

“May katabang ko,” tubag ni Vonna. “Pero mipauli siya sa ilang probinsiya kay nagkasakit ang iyang inahan. Wala pay seguro kun kanus-a siya mobalik.”

“Diin man nimo nakita ang mga tawo nga natingad-an og mga lihok?”

“Sa atubangang bahin sa balay. Sa mga gate. Ug sa luyo. Naglibotlibot sila.”

“Pila kaha sila ka tawo sa imong banabana?”

“Dili momenos sa lima ka tawo, Rey.”

“Mas maayo tingaling mag-hire ka’g security guard, Vonna, aron makabantay kanimo. Dili maayong mag-inusara ka lang dinhi labina panahon sa kagabhion. Nahibawo ka na sa panahon ron.”

“Mao bitaw nay akong plano. Ugma tingali, moadto ko sa usa ka security agency. Dili ko angay mokompiyansa, labina nga wala pa gyud madakpi ang mga mamumuno ni Daddy hangtod karon.”

“Sa ato pa, nagtuo ka nga kadtong mga tawo nga imong nakita kaganina nga naglibotlibot sa gawas ning balay may koneksiyon sa kamatayon sa imong amahan?”

“Mao kanay akong katahap, Rey. Karon lang kini nahitabo nga may mga tawong katingad-an og lihok nga naglibotlibot sa balay.”

Dihang lawom na kaayo ang kagabhion, nakahunahuna si Rey nga mananghid na siya kang Vonna nga mopauli na siya ngadto sa hotel nga iyang giistaran. Total, wala na man siya’y nakitang timailhan nga mobalik pa kadtong mga tawo nga gikatingad-an ni Vonna kaganina.

Apan naunhan siya ni Vonna sa pagpadayag unta sa buot niyang isulti ngadto niini.

“Mahimo bang anhi ka lang una matulog dinhi karong gabhiona?” gikan ni Vonna.

“H-ha?” Nakalitan si Rey sa gisulti ni Vonna.

“Gusto kong ubanan ko nimo dinhi karong gabhiona, Rey,” ni Vonna pa. -- Sumpayan pa