Nagtakoban nga pagbati

Gula 57

“I-I’m sorry, James,” ni Denia pa nga nagbasol sa iyang gihimo. “Pero sobra na ang imong pagpanginsulto kanako.”

“Get out!” Nagpangusmo sa kapungot si James nga mitudlo kaniya ngadto sa pultahan aron siya pagawason.

Apan wala mopatuo si Denia. Nahinaykan na niya ang pagsukol kang James. Puslan man nga nasugdan, iya na lang gayod kining pahinaykan aron maghuman.

“Ang nakadaot nimo kay imong iangin ang ubang mga babaye sa imong kasilag sa babaye nga nagluib nimo,” nagkanayon si Denia. “Dili ang tanang mga babaye sama kang Jinky Haber.”

“Damn you!” Gitulisok siya ni James. “Wala kay katungod sa pagsulti kanako’g ingon niana.”

“Wala ka usay katungod sa pagpasakit og sulti nako. Bisan kabos lang ko ug nagpaulipon ninyo apan wala kay katungod sa pagpanginlabot sa personal kong kinabuhi. Dili kay ikaw ray may kasingkasing nga sakitan. May kasingkasing usab kaming mga kabos.”

“Shit!”

Nagpangusmo si James nga mibiya sa atubangan ni Denia. Gibiyaan siya niini sa sulod sa study room.

Midali usab si Denia sa paggawas sa study room. Miagpas siya kang James nga misaka sa hagdanan paingon sa taas sa balay.

Paghimuntog ni Denia sa taas sa balay, nakasulod na si James sa lawak niini. Mipadayugdog siya paingon sa tungod sa pultahan sa lawak sa ulitawo ug nanuktok. Wala gayod siya mobiya sa pultahan hangtod nga giablihan kini ni James. -- Sumpayan pa