Sa pagtukod sa akong dakong balay sa Naga nga morag mansiyon sa kadako, dunay bungdo nga nahimutang sa tunga. Ako kining gipapatag tungod sa kadaghang anay niini. Una ako mibalik sa abroad, naporma na ang akong balay.
Unom lang ka buwan ang milabay, mibakasyon ako. Sa pagpanihapon namo, naghinugilon ang akong anak ulitawo nga nakatulog kuno siya usa ka higayon diha sa salas. Ug nianang mga ala-una sa kaadlawon, may nakita siyang tulo ka gagmay'ng tawo nga sa iyang tan-aw, unom ka pulgadas lang ang gitas-on, nga nagdula kini og bola.
"Wala lang gyud ko maglihok kay nahadlok kaayo ko," matud sa akong anak. "Pero sukad niadto, adto na ko matulog sa akong kuwarto."
Nianang mga alas dos sa kaadlawon sa una kong gabii sa akong balay, mibangon ako kay nakadungog ako og huni sa gitara o sista nga gikablitkablit. Sa akong paggawas sa among lawak, nakita ko sa ubos ang among 8-seater dining table ug ang sista diha sa ibabaw niini. Apan nakurat ako sa dihang may nakita ko nga tolo ka gagmay'ng tawo nga sama sa nagtinikling sa ibabaw sa lamesa ug molukso sila sa pikas kilid sa sista ug inigkasabod sa ilang tiil sa kuwerdas, motunog ang sista. Bisan gikulbaan ako, hinay akong nanaog ug giduol ko sila ug gipangutana.
"Nganong nia man mo sa akong balay?"
Mitubag ang usa sa gamay kaayong tingog nga wala nako hisabti apan ang aksiyon sa duha niya ka kamot akong hisabtan nga ang ila kunong gamay nga balay, gisapawan sa akong dakong balay ug dayon nilang panagan ngadto sa silong.
Sukad niadto kanunay na akong mobangon og kaadlawon, kay gusto kong ikasulti pag-usab ang tulo ka duwende. Usa ka gabii niana, didto kaming magtiayon matulog sa porch sa among balay.
Nianang pagka-kaadlawon may nadungog kaming nagtampisaw sa tubig didto sa silong diin adunay gripo sa tubig nga may gisawod nga putol nga drum nga puno sa tubig. Nakita namong magtiayon ang tulo ka duwende nga misaka sa paril nga halo blocks ug tagsa-tagsang milukso sa drum nga puno sa tubig.
Amo na lang silang gipasagdan ug wala namo tugawa ang ilang kasaya hangtod nahuman sila og pangaligo ug misulod didto sa silong sa among balay. Sukad niadto malaumon kami nga walay manghilabot kanamo sa gabii kay dunay mga duwende nga nagbantay sa among balay. (Kataposan)