Nagtakoban nga pagbati

 Gula 56

Misanting ang mga dalunggan ni Denia sa iyang nadungog. Sa sinultihan ni James, ingon sa giakusahan siya nga naghimo’g daotan uban kang Allan sulod sa lawak ni Nang Luding kagabii.

“Dili ka ba gayod diay makapugong sa kaigat?” Sikmat ni James. “Lisod ba gayod diay’ng pugngan ang biga ninyong mga babaye?”

 Ingon sa mibukal ang dugo ni Denia sa iyang nadungog ug misaka kini sa iyang tangkugo. Gitamparos niya si James.

Nakalitan si James sa gibuhat ni Denia. Mitutok kini kaniya nga siga kaayo ang mga mata. Ingon sa dili kini makatuo sa iyang gibuhat.

Bisan si Denia ingon sa dili kini makatuo sa iyang nabuhat ngadto kang James. Wala siya malimot nga anak kini sa iyang mga agalon. Apan ingon sa napuno na usab siya sa pagpanginsulto niini kaniya. Below the belt na kaayo ang sinultihan sa lalaki alang kaniya.

Dili siya guilty sa mga akusasyon ni James tungod kay wala siya naghugawhugaw sa iyang pagkababaye. Pero natumban ni James ang garbo sa iyang pagkababaye. Kinahanglang makaamgo si James nga nasayop kini sa ubos kaayong pagtan-aw niini sa iyang pagkababaye.

Namula pag-ayo ang aping ni James nga naigo sa kusog niyang pagtamparos. Ingon sa nagpaminti kini nga nagtan-aw kaniya. Kun usa pa kaha siya ka lalaki, hayan gisumbag na siya ni James. Nakasabot siya nga naningkamot usab ang ulitawo sa pagpugong sa temper niini. -- Sumpayan pa