Oras mo na, Rey Corpuz!

Gula 25

Taudtaod nga daw sa naghinuktok si Doktora Vonna Lazaro sa gisulti ni Rey Corpuz. Ingon sa nahiunlod kini sa lawom nga pamalandong.

“Nagtuo kong way kalabotan ang politika sa kamatayon sa akong amahan, Rey,” nagkanayon si Vonna pagkilab sa mga gutling.

“Nganong nakasulti ka man og ingon niana?” sukit ni Rey.

“Tungod kay wa siya’y kontra sa politika. Sa miaging election sa first district sa Cebu City, way kandidato nga miatbang kaniya.”

“Mao ba?”

“Mao kana, Rey.”

“Buyno, panghinaoton natong madakpan sa labing daling panahon sa kapolisan ang mga responsable sa pagpatay ni Cong. Lazaro. Kun madakpan na unya ang mga suspek, masayran na unya nato kun unsa gyu’y lintunganay nga hinungdan nganong gipatay nila si Congressman.”

Apan milabay na lang ang lima ka adlaw, wala gayod hidakpi sa kapolisan ang mga mamumuno ni Cong. Lazaro.

Niini, mibatig disappointment si Vonna sa performance sa kapolisan.

“Mga pulpol sila,” ni Vonna pa nga nahimangod.

“Ayaw pagsulti’g ingon niana,” badlong ni Rey. “Abi nimo, sa higayon nga mohunong na kita’g salig sa atong mga tinugyanan sa balaod, magsugod usab sila’g kainutil pagtuman sa ilang mga katungdanan.”

Wala na motingog si Vonna.

Dihang mitangkod nang usa ka semana ang nakalabay sukad sa pagpusil-patay kang Cong. Jovito Lazaro, nahiabot ang mga kabanay sa pamilyang Lazaro gikan sa States.

Gitakda dayon ang paglubong sa patay’ng lawas sa kongresista pagka-adlaw’ng Domingo. Sa dili pa ang paglubong, may necrological rites nga pagahimuon sa Rolling Mountains chapel diin gihaya ang kongresista.

Ug miabot ang adlaw’ng Domingo.

Pagsulod ni Rey Corpuz sa Rolling Mountains aron pagtambong sa necrological rites, gitunolan siya’g papel sa usa ka batan-ong babaye nga nagbarog duol sa pultahan. Iyang gisuhid ang papel. Usa diay kini ka necrological service souvenir program.

Gisuhid niya sa pagtan-aw ang ubang mga tawo sa sulod sa chappel. Iyang nasuta nga pulos sila naggunit og papel nga sama sa iyang gigunitan. Gipasalamatan ni Rey ang babaye nga naghatag niini kaniya. -- Sumpayan pa