Nagtakoban nga pagbati

Gula 54

Bisan wala niya makita apan sinati na niya ang maong tingog. Nakaseguro siyang kang James ang maong tingog.

Gihinay niya’g tukmod ang palid sa pultahan. Misulod siya. Gilig-on niya ang iyang kaugalingon. Nakaamgo siya nga niining higayona, dili siya angay magpabuntog sa nerbiyos. Spirited siya nga pagka-babaye busa kinahanglang magmalig-on siya. Andam na siya sa bisan unsang mahitabo sa panagsulti ni James karong buntaga.

Natukmaan ni Denia si James nga nagbasa og libro. Apan gitak-opan dayon sa ulitawo ang libro sa pagkamatikod niini sa iyang pagsulod. Mitutok kini kaniya.

Jame’s face gave nothing away. Walay bisan unsang emosyon nga masihag sa hun-ag sa panagway niini.

“M-may isugo ka ba nako?” si Denia maoy mibuak sa kahilom nga mipatunga nilang duha.

“Di ba giingnan ko na man ikaw nga dili ko gustong makita kang makig-flirt ni bisan kinsang lalaki?” Misumbalik og pangutana si James kaniya pangutana nga may dalang panukmat.

Wala makatingog si Denia.

“Nganong gisupak man nimo ang akong gibaod?” Gikan ni James. “Nasayod kong nag-abot kamo si Allan kagabii sa lawak ni Nang Luding.”

Nag-blush ang nawong ni Denia. “W-wala kami gihimong daotan, James,” mikurog ang iyang tingog.” -- Sumpayan pa