Oras mo na, Rey Corpuz!

Gula 22

Wala makalihok si Rey Corpuz dihang migakos kaniya si Doktora Vonna Lazaro. Mibakho pag-ayo si Vonna samtang naggakos kaniya. Gipasagdan lang niya ang babaye. Nakasabot siya sa kaguol ug kasakit nga gibati niini tungod sa kamatayon ni Cong. Jovito Lazaro.

Dihang inanay nang mibalik sa normal ang atmosphere, milugak na si Vonna sa paggakos kang Rey. Unya gidala siya niini ngadto sa dapit diin nalayo siya’g diyotay sa ubang mga tawo nga nanambong sa paghaya kang Cong. Lazaro.

“Salamat nga wa ko nimo pakyasa, Rey.” ni Vonna pa. “Abi ko’g unya na gyung gabii ka moanhi.”

“Ang tinuod, unya pa gyud untang gabii ko moanhi sumala sa akong gisulti nimo,” mipasabot si Rey. “Pero wa na ko mahinultol sa akong gibuhat human sa atong panagsulti kaganina sa cellphone. Nahingawa ko pag-ayo nimo maong mianhi ko’g sayo.”

“Usbon ko, salamat, Rey.”

“Nadakpan na ba ang mga responsable sa pagpatay sa imong amahan?”

“Wa pa. Hangtod karon nagpadayon pa ang kapolisan sa pagpangita sa mga kriminal.”

“May nakasaksi ba sa nahitabong pagpamusil didto sa airport?”

“Aduna kuno. Ang deskripsiyon nga gihatag sa mga saksi maoy gihimong giya sa kapolisan pagpangita sa mga suspetsado.”

Mipatigbabaw ang pagka-secret agent ni Rey. Gigisa niya sa daghang mga pangutana si Vonna. Hangtod nga mao na usay ilang gihisgotan ang mahitungod sa paghaya sa amahan ni Vonna nga congressman.

“Kanus-a nimo ipalubong si Cong. Lazaro?” Sukit ni Rey.

“Kun moabot na dinhi sa Sugbu ang among mga kabanay nga tua sa US,” tubag ni Vonna. “Mipahimangno man sila nga dili gyud ipalubong si Daddy kun dili sila mahiabot.”

“Ngano kahang gipatay man ang imong Daddy, no?”

“Dili ko makatubag nianang maong pangutana, Rey. Segon sa akong nasayran, way kontra ang akong amahan. Nasuheto ko niya. Ligdong siyang pagkatawo. Usa ka buotan nga amahan.”

“Di kaha politically-motivated ang iyang kamatayon?”

Wala dayon makatubag si Vonna sa ulahing pangutana ni Rey. -- Sumpayan pa