Kasingkasing sa inahan

Sa sinugdan maayo ang panabot ni Agaw Fred. Niini nahimo siyang tinamod sa among balangay. Apan sukad siya pareglahi dili na masabot ang iyang pamatasan. Gipusposan siya sa dos por dos samtang siya naglakaw sa aseras sa Colon sa lawom nang takna sa kagabhion. Maayong pagkagisi ang iyang bagolbagol. Nawad-an siya'g panimuot.

Sukad niadto nahanaw ang iyang katalamdom. Wala nay misalig kaniya. Gani, ang mga ginikanan sa kadalagahan sa ilang dapit hugot nga nagbaod sa ilang   mga anak sa dili pagsugot kaniya.

Usa sa nabuangan ni Agaw mao si Luzviminda. Kay guwapo si Agaw Fred na-crush siya sa ulitawo. Ugaling dakong supak ang inahan ni Luzviminda nga mahimo niyang umagad ang ulitawo. Hugot niyang gipinahan ang dalaga sa dili pagsugot niini.

Usa niana ka higayon....

“Luz, taluy-a na ‘tawon to,” nagkanayon si Agaw Fred nga yungit nang manulti.

“Pangita la'g lain, Fred, kanang maayonan sa imong inahan,” tubag ni Luzviminda.

“Dili ko ‘na mahimo, Luz,” ni Agaw pang gipanglugmawan sa mga luha. “Ikaw ra ang bugtong kong gihigugma ug ikamatay ko kun imo akong pakyason.”

“Aw, kun mao, tun-i ang imong inahan sa pag-ayon kanako. Sa higayon nga makakat-on na siya sa pagmahal nako, balik lang unya nganhi uban sa iyang kasingkasing.”

Nagdagan nga mipauli si Agaw Fred. Maoy iyang naabtan ang iyang inahan nga naghiwa sa kalabasa nga utanon niini alang sa paniudto. Iyang giilog ang kutsilyo ug gihansak sa dughan sa iyang inahan. Labihan niining pataya! Iyang gilugit ang kasingkasing ug nagdagan nga mibalik sa balay sa iyang hinalaran.

Sa kakusog sa iyang dagan napandol siya. Sa iyang pagsukarap napantok ang iyang ulo sa dakong bato nga miigdal. Nalagpot ang gibitbit niyang kasingkasing. Nawad-an siya'g panimuot.

Sa paghibalik sa iyang panimuot tin-aw na ang iyang panghunahuna. Iya nang natugkad ang sumbingay ni Luzviminda sa pagpadala sa kasingkasing sa iyang inahan. Iya nang nasuta nga ang kasingkasing sa iyang inahan nga ipadala kaniya ni Luzviminda dili diay kasingkasing mismo kundili ang gugma ug pagmahal niini ngadto kaniya. Mihilak siya ug mihilak!

Gipangita niya ang nalagpot nga kasingkasing. Iya kining napalgan nga naputos sa mga sagbot! Iya kining gipunit ug gipahiran.

“Dong, wala ka ba maunsa?” sa kasingkasing pa nga nakapasamot pagpa-mul-og sa iyang luha. (Katapusan)