Oras mo na, Rey Corpuz!

Mibatig dakong kahibulong si Rey Corpuz nganong naghilak si Doktora Vonna Lazaro nga nanawag kaniya.

“Vonna, unsay nahitabo?” Nangutana si Rey.

“Si Dady, Rey,” ni Vonna pa didto sa pikas tumoy sa linya nga nagbakho. “Si Daddy...”

“Naunsa man diay ang imong Daddy?”

“Patay na siya, Rey!”

“U-unsa?”

“Mipauli siya dinhi sa Sugbu gikan sa Manila ganinang buntag. Apan giatangan siya og armadong mga tawo sa iyang paggawas sa airport. Gipusil siya sa maong mga tawo ug nakaangkon siya’g daghang mga samad. Gidala siya sa labing duol nga hospital apan gideklarar nga dead on arrival.”

“My God!”

“Tabangi ko, Rey. Wa ko masayod sa angay kong buhaton karon. Nakalitan ko pag-ayo sa nahitabo.”

“Hain man karon ang patay’ng lawas ni Cong. Lazaro?”

“Tua, gidala na sa Rolling Mountains aron balsamahon. Adto ra sab siya didto hayaon.”

“Hain ka pa man diay karon?”

“Dia mi sa downtown. Kuyog nako ang usa ka higala. May gipamalit mi.”

“Kining...mahimo bang unya na lang tang gabii magkita? May mahinung-danon pa man gud kong giasikaso karon. May kalabotan kini sa akong misyon. Mag-abot na lang ta unya didto sa Rolling Mountains. Okey?”

“Sige, Rey, ikaw ang mag-igo. Basta...mahinungdanon alang nako ang imong presensiya.”

Gituman ni Rey ang iyang gisaad kang Vonna. Nasayod siyang nagkinahanglan kini sa iyang moral support gumikan sa kalit kaayong kamatayon sa amahan niining si Cong. Jovito Lazaro.

Imbes sa gabii pa ang sabot nila ni Rey ug Vonna nga mag-abot sa Rolling Mountains diin gihaya ang amahan sa babaye, alas tres pa sa kahaponon nahiabot na si Agent 11-M sa maong dapit.

Nakita dayon ni Rey si Vonna nga nag-apong sa lungon sa amahan niini. Iya dayon kining giduol. Naigking si Rey dihang pagkakita ni Vonna kaniya, kalit lang siyang gigakos niini. -- Sumpayan pa