Nagtakoban nga pagbati

Human magkasabot sila si Allan kagabii, nagtuo siya nga dili na siya makabaton og problema. Dili na mo-persecute si James kaniya.

Nagkanta-kanta siya samtang nanghugas sa mga kinan-an sa iyang mga agalon. Lagsik ang iyang mga lihok. Gaan kaayo ang iyang lawas.

Nahiabot si Nang Luding gikang naghatod sa pagkaon ni James didto sa lawak niini. Dala na niini ang mga platong kinan-an sa ulitawo.

“Ako na lay tiwas og panghugas, Day,” matud ni Nang Luding.

“Ako na lang, Nang,” ni Denia pa. “Hapit na man ni mahuman.”

“Ako na lang lagi. Gipatawag ka ni James. Gusto siyang makigsulti nimo.”

“H-ha? U-unsa man kunoy iyang tuyo nako, Nang?”

“Wa siya magsulti bahin sa iyang tuyo nimo. Pero sa akong pagsabot mora’g importante kaayo.”

Kalit lang gikulbaan si Denia. Unsa man kahay hinungdan nga gipatawag man siya ni James? May isugo kaha kini kaniya?
“Pakigsultihi lang siya, Day,” gikan ni Nang Luding, “aron imong masayran ang iyang tuyo. Tua na siya karon sa study room, nagpaabot nimo.”

Miadto si Denia sa study room. Mihunong siya sa iyang paghitungod sa pultahan sa maong lawak kay mikusog ang pagbutok-butok sa iyang dughan. Mihabwa siya’g daghang hangin gikan sa iyang ginhawaan aron pagpaluag sa iyang dughan. Unya mituktok siya sa pultahan.

“Sulod lang,” nabati niya ang tingog sa usa ka lalaki gikan sa sulod. -- Sumpayan pa