Nagtakoban nga pagbati

Gula 47

Pagkagabii, human sa panihapon, gitabangan ni Denia si Nang Luding sa mga buluhaton sa kosina.

Dihang nahuman na ang ilang trabaho, ilang gipalong ang suga sa kosina ug misulod sa tagsatagsa nila ka lawak sa servant’s quarter.

Samtang naghigda si Denia sa lawak, gibati niya ang kagaan sa iyang gibati. Bisan dili maayo ang gipakitang pagtagad ni James kaniya apan may binuhat nga misimpatiya kaniya, no less than Mrs. Ricarte nga inahan mismo sa ulitawo.

Nakahukom siyang i-ignore ang bisan unsang isulti ni James kaniya. Kutob sa mahimo molikay siya niini aron dili sila magkabayloay og sakit nga mga pulong. Labaw sa tanan, aron dili na mainsultohan ni James ang iyang pagka-babaye.

Naputol ang paghanduraw ni Denia sa dihang may nanuktok sa pultahan. Mibangon siya ug gibuksan ang pultahan. Apan nakugang siya pagkakita nga si Allan ang diha sa gawas.

“Mahimo bang magsulti ta’g kadiyot?” hangyo ni Allan.

“S-sorry, Allan,” nagkanayon si Denia. “Pero dili mahimo...”

Dayon gibalik niya pagtak-op ang pultahan sa lawak. Si Allan didto sa gawas nagsige og panuktok. Apan wala gayod kini niya ablihi. Gipiyong niya ang iyang mga mata samtang gisandig ang iyang bukobuko sa palid sa pultahan.

“Denia, ablihi kining pultahan, giubanan ni Allan sa pagsangpit sa iyang ngalan ang pagpanuktok niini didto sa gawas. “Magsulti unta ta please...” -- Sumpayan pa