Bayot diay ang asawa ni Sir

Nia na ako ning magahob nga siyudad sa Sugbu. Gikan ko sa suok nga dapit sa Mindanao nga mao ang namat-an ko og kahayag. Mianhi ko dinhi sa Sugbu binalon ang dakong pangindahay nga unta makaplagan ko dinhi ang kalibotan nga dugay ko nang gipangandoy.

Ang kalibotan nga dili sama sa gigikanan kong dapit nga puno sa pag-antos gumikan sa walay samang kawad-on. Kabus ang kalibotan ko didto nga bisan pa sa walay pagkutat namong pagpaningkamot pagbugwal sa yuta nagpabiling hakog ang kapalaran kanamo ug wala gayo’y bisan tipik na lamang sa paglaom nga moasenso!

Paghitugsad sa akong mga tiil sa sementadong pantalan nabatyagan kong daw milumpayat ang akong kahiladman sa tumang kalipay nga nahimulag na sa gigikanan kong kalibotan! Unya misakay dayon ko’g dyip nga pasaheroan binitbit ang karaan kong bag nga mibutirik sa kapuno sa sulod nga mga sinina ug uban pang mga kagamitan. Wala ako masayod kung asa ako paingon ning higayona kay wala ako’y kaila dinhi sa Sugbu nga sarang kong masak-an. Ang Diyos na lamang ang mag-igo kung unsa may akong dangatan ning akong pagpanimpalad!

Gipahunong ko ang gisakyan kong dyip dihang akong nakita ang dagko ug tag-as nga mga edipisyo sa palibot. Nanaug dayon ko sa gisakyan kong dyip tapos mahatag sa drayber ang plite. Ug puno sa kakulba nga misugod paglakaw aron mangita og trabaho.

Milabay ang pipila ka gutlo sa akong paglatagaw ug nakita ko ang puting papel nga gipapilit sa bungbong sa dakong tindahan. Nasulat sa maong papel ang pulong nga nagkanayon- Wanted Stay-in Helper! May natala sa ubos niini nga natukma usab sa akong alamag. Hayskol gradwit ko ug dise otso anyos na busa misulod dayon ko sa tindahan ug miaplay. Ug gidawat ko human sa taudtaod gayod nilang pagsukitsukit kanako kabahin sa akong pagkatawo. Gipasugod dayon ko sa akong amo nga si Mr. Rene Monte ug sa iyang asawa nga si Mrs. Freda Monte.

Gihatod ko ni Mrs. Monte ngadto sa lawak nga alang kuno kanako, kay stay-in man ako. Ug milurat ang akong mga mata sa akong nakita sa sulod. Maoy misugat sa akong panan-aw ang katahom sa lawak nga alang lamang sa espesyal nga tawo. Kompleto usab kini sa mga aplayansis.

“Dinhi ka lang sa sulod sa lawak ug hatdan ka lang namo og pagkaon.” Ni Mrs. Freda Monte pa kinsa miabag kanako sa pagsulod sa akong mga biste ngadto sa aparador. “Naay banyo dinhi nga kompleto na sa mga kagamitan alang sa imong pagkaligo!”

Wala ko makatingog gumikan sa tumang kalibog ning pagtratar kanako sa akong amo. Daghang mga pangutana ang nahimugso sulod sa akong kaisipan apan wala ko gayud kini malitok hangtod nga migawas si Mrs. Freda Monte sa lawak. Giam-aman ko na lang ang akong kaugalingon ug giandam alang sa bisan unsa man nga mahitabo. Unya miduol ko ug mihigda sa hinol nga kama aron mopahulay kay gikapoy na sab ko sa biyahe. Ug dali ra kong nakatulog.

Mitimbakuwas ko sa pagbangon dihang akong namatngonan nga may kamot nga mihiram sa pribadong bahin sa akong lawas. Ug akong nakita si Mr. Rene Monte nga wala nay sapot ug migakos kanako. Milugnot ko apan wala ko mapiog ang kusgan niyang mga bukton. Ug milampos gayud siya pagkutlo sa akong pagkaberhin.

“Ayaw kabalaka, Day Gina, kay sugod ning adlawa kabahin ka na ning balaya,” ni Mrs. Freda Monte pa dihang ako siyang gitug-anan sa gibuhat sa iyang bana kanako. “Dili ka na katabang dinhi!”

“Unsay buot mong ipasabot, Ma’am?” Nako pa dayong pahid sa mga luha nga nanaligdig sa akong aping.

“Dili ko mahatag kang Rene ang gipangandoy namong anak, Day Gina, busa nagkasabot kami nga ikaw maoy himuon namong instrumento aron kami makaanak. Diha sa imong tagoangkan itisok ni Rene ang binhi sa iyang pagkalalaki kay mao lamang kini ang paagi nga makabaton kami og anak. Hatagan ka namo sa tanan mong gikinahanglan ug hinaot nga dili mo kami pakyason!”

Miyango ko agi’g pag-uyon sa gihangyo ni Mrs. Freda Monte kanako. Gibati ko karon ang kaluoy ngadto sa magtiayon. Unya misulod sa lawak si Mr. Rene Monte nga iyang bana ug naghangpanay kaming tulo. Ug unya nasawod sa akong pandungog ang kausaban sa tingog ni Mrs. Monte. Kalit nga miluray ang iyang tingog nga maoy nakapahiamgo kanako nga siya dili diay matuod nga babaye. Bayot diay si Mrs. Freda Monte! (Kataposan)