Nagtakoban nga pagbati

Gula 46

 “Ayaw kabalaka, Ma’am,” ni Denia pa. “Nakasabot ko sa gibati ni Sir James. Gisultihan na ko ni Nang Luding sa nahitabo kaniya. Mao nga wala na lang nako hatagi’g bug-at nga pagtagad ang iyang gipanulti ngari kanako. Kutob sa mahimo molikay na lang ko nga dili kami magkaduol.”

“Maayo hinuon kun mao kana. Dili man gud ko gusto nga makahunahuna ka unya nga mopahawa dinhi tungod lang sa dili maayong pagsinabtanay ninyo ni James.”

“D-dili kana mahitabo, Ma’am. Gimahal nako ang akong trabaho. Gusto ko nga pinaagi niini makatabang ko sa akong mga ginikanan ug mga igsuon nga atoa sa among probinsiya.”

“Nalipay ko nga nakadungog niana gikan mismo sa imong baba. Ang tinuod, dili usab ko gusto nga mopahawa ka dinhi tungod kay nakauyon kami si Sir nimo sa imong serbisyo. Buotan ug kugihan ka. Kasaligan sa mga bulohaton. Gani, nakadayeg man pag-ayo si Luding kanimo tungod kay nakatimbang ka’g maayo kaniya sa mga buluhaton dinhi sa balay.”

“Daghang salamat, Ma’am, sa iyang pagsalig nako.”

“Lisod kaayo ang pagpangita og katabang nga buotan ug kasaligan karong panahona. Mao nga dili ko buot nga mobiya ka dinhi. Ayaw kabalaka, hinayhinayan nako’g pasabot si James aron magkauli ang maayo ninyong kabubut-on.”

“A-ayaw na lang, Ma’am. Tingalig mosamot unya hinuon ang kasuko ni Sir James nako. T-tingalig nagtuo siya nga nagpahaba ko nimo.”

“Dili kana mahitabo. Sa gikaingon ko na, ako nay maantigong mopasabot kaniya sa hinayhinay.” -- Sumpayan pa