Espat nga grabe kasiga bisan way baterya

Hilabihan nga nakadip-ig aron sikitan sa pag-ayo ni Bartolo, si Repsalia nga nagsaulog sa iyang debut, taliwala ning kahawot sa huni, samtang sila nagsayaw.

Gibag-ohan man gud si Bartolo, nga sukad siya nabiyudo, sulod na karon sa lima ka tuig, nga mitaliwan na kaniya si anhing Laydang, karon pa gayod siya makausab og gakos og babaye nga hilabihan pa kabatan-on.

“Kinahanglan Pre Bartolo.... dili gayod nimo sipyaton sa akong espesyal nga imbetasyon, karong umaabot nga adlaw’ng Sabado, sa may alas otso sa gabii,” ni Kumpare pa niya Oming, nga mituyo lang gayod pag-adto sa iyang pinuy-anan sa balangay sa Pitalo.

“Kay unsa man diay nga okasyon Pre Oming, nga mituyo man gayod ikaw sa pagpangimbitar kanako?” miisa ang kilay ni Bartolo nga nagpakisayod sa iyang pinakasuod nga Kumpare.

“Mag-debut ang bugtong kong anak nga babaye, Pre Bartolo ug aron pagdugang sa kabibo sa maong okasyon, gawas nga mag-ihaw ako og upat ka buok kanding nga akong pangunayan og kalderitas, aduna pa gayo’y sayaw-sayaw sa mga batan-on ug tiguwang nga akong pagahimuon, duol sa akong balay!” ni Kumpare pa niya Oming, nga hilabihang pagpanuasik sa laway.

Wa pa gani mamatog ang mga binuhi nga manok ni Bartolo, nagsubay na siya sa tungason nga dalan, diin dili gayod saypon nga motungas siya og upat ka buok taluktok sa bungtod.

Kini wa lang gayod igsapayan ni Bartolo, ilabi na nga nag-alintabo ang iyang hunahuna, nga iya gayod nga unahon og sayaw si Repsalia. Makita ra man unya ang katag kun dili ba ganahan kaniya ang maong batan-on nga dalaga nga anak nga bugtong sa iyang Kumpare.

Gipalabi og sayaw ug una ni Bartolo, si Repsalia, imbis siya pakan-on sa bag-ong hinaon nga nangalisngaw pa sa kainit nga kalderitas nga linuto sa iyang Kumpare.

Samtang nagpaanod siya uban ni Repsalia, sa naghinubrang kahawot sa sonata, may mikalit og siwil sa may kilid sa iyang bulsa diin gihagawhawan siya og pangutana sa dalaga nga nagkanayon:

“Unsa man nang kagahi sa imong bulsa Lolo Bartolo, nga nasaghiran sa akong kamot?” Mausisahon nga nangutana kaniya si Repsalia.

“Nagdala man gud ko og espat Inday Repsalia, kay ngitngit kaayo ang dalan nga sa akong pagpauli, dili ko makit-an ilabi na nga hilabihan kadangog!” daling nakadiskarte og pamakak si Bartolo.

Mikalit lang paghugong og dagan si Repsalia, sa dihang gumikan sa kagahi...migawas kini sa iyang bulsa ug nagsiga. (Kataposan)