Dili na hibintahaan si Kanot kun uyab nay hisgotan dinhi sa ilang balangay sa San Roque. Ngilngig kini si Kanot sa mga babaye kay kutob sa iyang pangulitawhan dili gyod mahitabo nga dili niya mauyab.
Matud pa sa mga ginikanan ni Kanot nganong si Kanot dugokon og mga babaye tungod kuno lagi kay awman kini. May awom kuno kini si Kanot sa iyang kinatawo nga maoy nagdalag sinyal niini nga humok kaayo niyang pasugton ang mga babaye.
Tingali sa tanang mga dalaga dinhi sa ilang baryo ni Tanciang ra gyod ang wala niya mauyab. Hilomon man sad god kini si Tanciang ug dili kini hilig og apil-apil sa mga kalihokan sa mga batan-on dinhi sa ilang balangay. Guwapa kini si Tanciang.
Patay na ang amahan niini nga si Doro ug wala na pod ang iyang inahan kay matud pa natigbasan kuno didto sa silingang baryo kay nasakpan nga nagtuwad sa ilawom sa silong sa balay sa usa sa mga lumulopyo didto. Ug naa na lang siya mopuyo sa iyang apohan nga si Columba nga gidungogdungog nga ungo.
Apan wala pay giabat si Columba dinhi sa ilang baryo. Tingali maikog pud siya kay matud pa dili man kuno mangunay og silingan ang mga ungo. Si Todio nga bana ni Columba miadto sa Mindanao apan wala na igdungog ug may nagbalita napusilan kuno didto kay hisakpan sa bana nga namalbal sa asawa niini. Ug mao kini karon ang problema ni Kanot kay gusto niya nga iyang uyabon si Tanciang.
Ug sa ingon niana mosamot na gyud ang iyang pagka hambugero nga ang wala na gyoy mapunit dinhi sa ilang balangay kay ang tanang mga dalaga iya nang nauyab. Ug silang tanan pulos niya nadala sa sinehan ug iya pa ganing nadala sa motel ang pipila kanila.
“Gusto ko, Bay Simo, nga akong i-date si Tanciang sa siyudad. Manan-aw mi’g sine, mangaon, ug unya ako siyang dad-on sa motel, di ayos kaayo, no, bay Simo?” mitingsi si Kanot nga misugilon ngadto sa iyang higala nga si Simo.
“Matay beliba gyod nako nimo, uy, Bay Kanot, ikaw na gyod ang giilang hari sa panguyab dinhi sa ato,” ni Simo pa usab nga mipaundayon sa iyang higala. “Pero, Bay, wala ba manlimbawot ang imong balahibo?”
“Nganong nakasulti ka man nga manlimbawot ang akong balahibo?” miiknat ang kilay ni Kanot.
“Mga ungo man na’g kaliwat sila si Tanciang. Kana god si nang Columba nga iyang apohan puwerte man kuno nang ungoa. Adto man kuno na mangabat sa pikas baryo, usahay kuno, makit-an kana siya nga kuyog ni Tanciang,” miigham si Simo.
“Tuo ka man anang tabitabi, Bay Simo. Basta kay alang kanako si Tanciang maoy akong tinud-on ug unya pangasaw-on,” unya nahilom si Kanot. Naglibog bitaw pod si Kanot sa iyang kaugalingon nga si Tanciang man ang nakapapipitik sa iyang kasingkasing.
Tuod man, dihang nag-date na sila si Kanot ug Tanciang didto sa siyudad may namatikdan si Kanot nga ingon sa dili gyod modumili ang dalaga sa iyang pagabuhaton niini — didto sa sulod sa sinehan way reklamo nga iya kining gihagkan ug gihikap ang dapit sa dughan.
Ug karon nia na sila sa sulod sa usa ka motel. Gihubo dayon ni Kanot ang sinina ug karsones samtang si Tanciang mihinayhinay usab og hubo sa iyang sapot.
Karon, ila nang gikatkat ang bungtod sa himaya. Unya sa naghawok na sila nakasinggit si Kanot kay naputol ang iyang dila. Gipaak ni Tanciang. Ayaaay! misinggit siya sa kasakit. Unya iyang nakita nga nanggimaw ang tag-as kaayong tango ni Tanciang. Ungo si Tanciang! Ug nag-brief lang siya nga nagdagan gawas sa usa ka motel. “Ungooooo! Assss! tabanggggg!” milanog ang tingog ni Kanot. (Kataposan)