Nagtakoban nga pagbati

Gula 44

Dili siya kombinsido sa gisulti ni Nang Luding nga tingalig hilom nga nakagusto si James kaniya hinungdan nga magselos kini kun makakita nga makigsulti siya kang Allan. Alang kaniya, layo ra sa tinuod ang pangagpas ni Nang Luding. Wala niya ma-feel bisan gamay nga may pagbati si James kaniya.

Ug bisan pa kaha kun matinuod ang pagduda ni Nang Luding, dili mahitabong patolan niya si James. Tinuod nga nakagusto siya niini. Apan na-turn off na siya gumikan sa dili maayong behavior nga gipakita sa ulitawo kaniya.

Natugaw ang iyang pagpamalandong sa dihang may nanuktok sa pultahan sa iyang lawak. Mibangon siya ug giablihan ang pultahan. Si Nang Luding ang iyang nakita nga nagbarog sa tungod sa pultahan.

“Ngano, Nang?” Sukit ni Denia.

“Gipatawag ka ni Mrs. Ricarte,” tubag sa lagas.

“Nga-ngano man kuno?”

“May isulti kuno siya nimo.”

“U-unsa man kahay iyang tuyo nako, Nang?”

“Nagtuo ko nga bahin kaninyo ni James.”

“H-ha?”

“Nasayod na si Mrs. Ricarte, nga dili maayo ang pagtinagdanay ninyo ni James.”

“G-giunsa man niya sa pagkasayod, Nang?”

“Akong gitug-anan.”

“U-unsa?” -- Sumpayan pa