Oras mo na, Rey Corpuz!

Gula 14

Gitutokan ni Rey Corpuz si Dra. Vonna Lazaro. Wala siya makatugkad kun nganong nakaingon ang doktora nga pamilyar niini ang panagway ni Althea.

“Posibleng nasayop lang ko,” ni Dra. Lazaro pa. “Basta kay mora’g nakakita na ko niya. Di lang nako ma-trace kun diin ug kanus-a.

“Basin kamay-ong lang niya ang imong nakita,” ni Rey pa. “Aduna man goy mga tawo nga magkamumay-ong.”

“Posible sab.”

“Ikaw gani, duna ka man say ka-look alike.”

“Mao ba?”

“Yes.”

“Kinsa man kuno, Aber?”

“Si Angelina Jolie.”

“Saba diha.”

“Tinuod lagi.”

Naigking si Rey dihang ingon sa nakusog ni Dra. Lazaro ang pagpahimutang sa bendahe sa iyang samad human sa dressing niini.

“Balik gihapon ka ugma dinhi, ha,” ni Dra. Lazaro pa.

“Yes, Dra. Lazaro,” tubag ni Rey.

“Sangpita na lang ko’g Vonna. Pormal ra kaayo ang Dra. Lazaro.”

“Ikaw ang mag-igo, Vonna. Ug Rey na lang sab ang isangpit nako. Mas komportable ko kun tawgon sa akong ngalan.”

Gikan sa tambalanan, nagpahatod si Rey og taxi ngadto sa five star hotel nga iyang giistaran.

Pag-abot ni Rey sa hotel, midiretso siya sa iyang suite. Sa iyang pagsulod, nakamatikod siya nga may tawo sa sulod sa banyo. Naglagasak ang tubig didto sa sulod ug nagsiga pud ang suga.

Sa kalit lang gilanit ni Rey ang iyang armas. Misantop sa iyang hunahuna nga may daotang tawo nga nakasulod sa iyang lawak. Usa ka intruder. Maong nangandam siya.

Miliraw-liraw ang mga mata ni Rey sa palibot sa lawak. Unya mihinay siya’g duol sa pultahan sa banyo. Mituktok siya’g makatulo.

Dihang naabli ang pultahan, gitionan dayon niya sa gigunitan niyang armas ang tawo nga didto sa sulod sa banyo. -- Sumpayan pa