Nagtakoban nga pagbati

 Gula 43

“Dili tanang mabungat sa baba naggikan sa kasingkasing, Day. Adunay mga pulong nga mogawas sa baba nga gituyo aron pagtabon sa matuod nga gibati.”

“Ambot lang kaha, Nang. Basta kay para nako, imposible kanang mahitabo. Estrikto lang gyud tingali si James mao nga lakip ang pribadong kinabuhi sa mga tawo nga naghangad sa ilang kadato buot pa niyang panginlabotan.”

“Buotan baya kana si James, Day. Nahibulong man gani ko kun nganong ingon niana ang iyang tinagdan nimo.”

“Sagdi lang, Nang. Total, dili man gyud siya ang akong tinuod nga agalon. Ang akong mga agalon mao sila si Mr. ug Mrs. Ricarte tungod kay sila ang magsuweldo nako.”

“Husto ka, Day. Mao nga ayaw na lang tagda kana si James. Ang importante nga nagtuman ka sa imong mga obligasyon dinhi isip usa ka sulugoon.”

Human sa paniudto, mipahulay si Denia sulod sa iyang lawak sa servant’s quarter. Samtang naghayang siyang naghigda sa katre, nagpitokpitok usab ang iyang mga mata nga nagtutok sa kisame. Nahiunlod siya sa lawom nga pagpalandong.

Maoy iyang gihunahuna ang gipakitang taras ni James kaniya. Wala siya makasabot kun unsang bakukanga ang misulod sa utok sa ulitawo nga lakip sa pagpakigsulti ni Allan gidid-an na man siya niini. -- Sumpayan pa