Ang matuod nga gugma

Managhigala sila si Flor ug Fritz sukad pa sa ilang pagkabata. Graduating na sa high school si Fritz sa dihang iyang nasayran nga may pagbati diay siya alang kang Flor apan iya kining gililong aron dili maapektuhan ang ilang panaghigala.

Ug karon, usa na siya ka inilang engineer sa ilang lugar apan wala gihapon niya napaambitan ang gitagoang pagbati ngadto kang Flor nga karon usa na ka hingpit nga magtutudlo.

Apan usa ka adlaw niana, may nabatian si Fritz gikan sa amigo nga si Wency nga may uyab na si Flor ug pila nalang ka adlaw kaslunon na kini. Buot niya kining pakisayran busa nakigkita gilayon siya kang Flor.

"Flor, tinuod ba kining akong nadunggan nga kaslunon na ikaw?" ingon sa kahilakon nga nangutana si Fritz sa dalaga.

"Oo, Fritz, kaslunon na ako kang Wendell. Sunod semana na ang among kasal ug pasayloa ako nga wa ko ikaw mapahibaw gumikan sa akong ka bise sa pag-atiman sa among kasal."

Human sa nadungog, nabati ni Fritz ang tumang kasakit sa iyang dughan ingon sa morag gikumot-kumot ug gituslukan sa dagko nga dagom. Apan iya kining gipugngan. Ug miabot na ang adlaw sa kasal ni Flor ug dakong kakurat ni Fritz sa dihang kalit nga mibutho si Flor ug nagpanawag sa iyang ngan.

"Flor, nganong ania ka man? Dili ba karon na ang adlaw sa imong kasal?" Daw sa nahibong nga pangutana ni Fritz kang Flor bisan tuod gibati siya og kalipay nga nakita niya kini ug ania pa sa ilang panimalay.

"Miatras ako sa among kasal kay ikaw ang akong matuod nga gihigugma, Fritz. Dugay na akong naghuwat nga daygan sa imong gugma busa ania ako karon. Nabatyagan ko nga susama kita og gibati," naghilak nga miatubang si Flor kang Fritz ug migakos sa naulahi.

Ug wa na makapugong pa si Fritz, diha-diha iya kining gigakos og maayo daw sa dili na kini niya buhian ug mihunghong.

"Salamat Flor nga wa ka modayon sa pagpakasal kang Wendell. Tinuod gayud nga ang matuod nga gugma maoy masunod ug magmadaugon".

Naggakos na sab sila. Ug nag-akob ang ilang mga ngabil. (Kataposan)