Gula 42
“Nakakita diay siya nga nagsutihanay kami si Allan kagabii sa gawas sa servant’s quarter. Iya kong gibaoran nga dili na makigsulti ni Allan.”
“Ngano man kuno?”
“Dili kuno siya buot nga makig-flirt ko ni bisan kinsang lalaki. Gihilasan lang kong naminaw niya. Kun magsulti siya, mora gyud og dako siya’g katungod sa akong kinabuhi.
May amused nga pahiyom nga mibathay sa mga ngabil ni Nang Luding. “Wa kaha makagusto sa hilom kanimo si James, Day?”
“Nga-nganong nakasulti ka man og ingon niana, Nang?” Mikunot ang agtang ni Denia samtang mitutok kang Nang Luding.
Makapaduda man gud ang iyang sinultihan. Kun did-an ka niya sa pagpakigsulti ni Allan ug sa pagpakigsandurot ni bisan kinsang lalaki, ang buot ipasabot nga tingalig nagselos siya.”
“H-ha?”
“Mao kana, Day. Basin diay kun naigo ang iyang kasingkasing sa pana ni Kupido sa iyang pagkakita kanimo.”
Kadiyot nga naghinuktok si Denia.
“Dili ba posible nga matinuod ang akong pagduda, Day?” Sukit ni Nang Luding nga nakatandog sa kahimungawong si Denia.
“Imposible kanang mahitabo, Nang,” maluyahong tubag sa dalaga.
“Ug nganong imposible man?”
“Tungod kay misulti na siya nako nga dili ko niya type.”
“Ug mituo ka lang usab dayon?”
“Unsa man diay? Naggikan gud ang maong mga pulong sa iyang baba?” -- Sumpayan pa