Tambal gikan sa lawas

Niinom tood kag ihi, attorney? sukot ni Noy Duar ni Rudy nga nag-itsa-itsa’g bola sa basketbolan sa Talamban. Wa pa nisilang ang adlaw ning buntaga. Unya si Noy Duar nag-ehersisyo pod og libutlibot sa basketbolan. May tindahan siya atbang sa basketbolan dapit sa kasadpang habig. Naisa ang kilay ni Rudy. Wa siya magdahum nga mangutana ang iyang higalang tiguwang mahitungod ini.

Nagkasuod si Rudy ug Noy Duar kay hapit kada adlaw mag-abot sila sa basketbolan. Ug ang bupete ni Rudy ug lawak giabangan duol ra sa basketbolan. Tulo na ka tuig nga nag-opisina si Rudy sa Talamban. Nibalhin siya dinhi kay naglikay sa mahal nga abangan sa mga opisina duol sa dakbayan. Iyang pamilya tua sa Carmen, Cebu. Mag-ulian siya ma-Sabado’g Domingo. Semi-retire na siya pagpanglaban. Kay nakahuman nag kurso iyang duha ka mga anak dalaga. May sakit na siyang artraytis ug dayabitis.

Sa miaging tuig nikomplikar iyang dayabitis sa iyang baga. Nasakit sab siya’g pneumonia. Napulo ka adlaw siyas Green Meadow Medical Center. Gioperahan iyang toong kilid. Gibuslotan ug gipasudlan og plastic nga tubo. Gipasuyopan iyang baga aron mahabwa ang bagang plema nga niputos niini.

Dako iyang gasto. Nakautang-utang siyas iyang mga kliyente. Paggawas niyas ospital, pwerte niyang dauta. Samot pa nga nitag-as ug nikalkag iyang buhok. Unya gituboan siya’g bungot nga ubanon. Mora siya’g himatyon tan-awon. Duha ka taksi nibalibad niya. Ang mga drayber nahadlok nga anha siya mamatay sa taksi. Maayo gani kay ang ikatulong taksi nga niagi, nakaila niya ang drayber.

Si Mrs. Tan usa sa iyang mga kliyente nga nautangan niya. Dihang naningil kini, iya unang gibalibaran.

"Di pa ko kabayad nimo’g dali kay daghan pa kong tambal gimintin. Sayis sintos pesos ang balor sa tambal nako kada adlaw," ni Rudy dihang nanawag ang kliyente.

"Unsa gani toy sakit nimo, attorney?" ni Mrs. Tan.

"Pneumonia," ni Rudy.

"Duna koy tambal pasuwayan nimo. Paghumol og duha ka itlog sa imong ihi. Dangtag tulo ka adlaw, suyopa ang sulod sa itlog. Segurado molagsik imong lawas," ni Mrs. Tan. Gilainan unta si Rudy.

Apan sa laing bahin, way komo sa pagsuway. Gisuwayan niya. Dunay umento sa pamati niyas panglawas. Daw nabaskog siya.

Dangtag tulo ka buwan, nibisita gyud ni Rudy si Mrs. Tan. Napugos si Rudy pagbayad sa iyang utang. Mapasalamaton si Mrs. Tan.

"Aron gyud mawala imong gastohan sa tambal, hatagan tika’g duha ka libro. Basaha lang unya to. Ako lang ipadalas akong tawo. Kay wa pa mahumag basa sa akong higala," ni Mrs. Tan dayong lakaw.

"Morag maglabi seguro ang spiritual of faith healing adtong imong mga libro?" ni Rudy.

"Way labot ang spiritual o faith adto. Hinoon, ang nature o kinaiyahan. Natural healing," ni Mrs. Tan. Mapahiyomon nga nigawas sa bupete.

Sukad nabasa ni Rudy ang mga libro, wa na siya magpalit og tambal. Gituman niya ang sugyot sa libro. Nabaskog na sa hingpit iyang lawas bisag way tambal. Magbantay lang hinoon gihapon siyas iyang pagkaon ug paugnat sa kusog.

"Ihi nako. Dili ihi sa laing tawo," ni Rudy nga nagpahiyom.

"Unsa may epekto?" ni Noy Duar.

"Nawala akong tanang sakit. Wa na ko magsalig og tambal!" ni Rudy.

"Buanga god!" ni Noy Duar. "Diin man nimo masayri nga tambal ang ihi?" dugang niya.

"Sumala sa libro akong nabasa, ang ihi dili diay hugaw nato. Sobra lang nga likido sa lawas. Ang ato konong lawas momugna og tambal para sa atong sakit. Ang maong tambal mosagol sa atong ihi," ni Rudy.

"Unsang mga sakit matambalan sa ihi?" ni Noy Duar.

"Sa pag-research nako sa Internet, 175 ka sakit. Lakip na ang Cancer, AIDS, Leukemia, Diabetes, Arthritis ug uban pa." ni Rudy.

"Kun mao na, moinom na sab kos akong ihi? Kay daghan kaayo kong gipamati sa akong lawas" ni Noy Duar.

Nipadayon sa paglibutlibot sa basketbolan. Nipadayon sab si Rudy sa pag-itsa-itsa og bola. (Kataposan)