Gula 37
May isulti pa unta si Allan sa dihang kalit lang mihangad si Denia ngadto sa taas sa balay. Nahanunot pagtan-aw si Allan sa iyang gitan-aw. Misiga man gud ang suga sulod sa lawak ni James. Nakita ni Denia nga naabli ang bentana sa lawak ug milili si James sa gawas.
Mikuba ang dughan ni Denia. Nabalaka siya nga tingalig nakit-an sila si Allan ni James samtang nagsultihanay.
“S-sige, Allan,” nananghid na si Denia sa ulitawo,” mosulod na ko sa akong lawak katulgon na ko.”
“Sige,” sanong ni Allan. “Good night.”
“Good night,” tubag ni Denia dayong sulod niya sa iyang lawak sa servant’s quarter.
Pagkabuntag madasigon si Denia nga mituman sa iyang bulohaton. Siya’y nagsilbi sa magtiayong Ricarte sa ilang pagpamahaw. Si Nang Luding maoy naghatod sa pagkaon ni James ngadto sa lawak niini.
Nanumpa na si Denia sa iyang kaugalingon nga dili na gayod siya mosulod sa lawak ni James bisan kanus-a. She couldn’t risk another rejection from him.
Gihipos niya ang mga pagkaon sa lamesa human makakaon ang magtiayon. Nahiabot si Nang Luding gikang naghatod sa pamahaw ni James.
“Makigsulti kuno si James nimo,” taho sa lagas kaniya.
“U-unsa?” Nakugang siya. “Nga-ngano man kuno? -- Sumpayan pa