Oras mo na, Rey Corpuz!

Gula 6

Sa teyoriya sa kapolisan, mga sakop sa teroristang grupo nga Jehadda Sellamiah ang responsable sa pagkagun-ob sa Bouseit Hotel ug ingon man kadtong mga tawo nga gikasangka sa grupo ni Chief Inspector Ringo Cortez nga giayudahan ni Rey Corpuz.

Mihimo’g linain nga imbestigasyon si Rey mahitungod sa maong hitabo. Nagtuo siya nga may koneksiyon sa iyang misyon -- pagdakop sa international terrorist nga si Abaddon-- ang nahitabong pagkagun-ob sa Bouseit Hotel. Kay kun tinuod nga mga sakop sa Jehadda Sellamiah ang naghimo sa ingon, posibleng makahatag kini kaniya’g giya paglukong ni Abbadon nga maoy lider sa nahisgotang teroristang grupo.

Nakaukay dili lang sa Sugbo kun dili sa tibuok Pilipinas ug sa ubang dapit gawas sa nasud ang nahitabong makalilisang nga pagkahugno sa Bouseit Hotel. May mga sakop sa lainlaing international media organizations nga nangabot sa Sugbu aron pagsusi sa maong hitabo.

May mga nasud nga nagpagawas dayon og travel advisory nga ang Pilipinas, partikular na ang Sugbu, dili usa ka safe nga dapit alang sa mga bisitang langyaw. Mitumaw ang kabalaka nga posibleng dili mahinayon ang pagpahigayon og ASTO Summit sa Sugbu tungod sa makalilisang nga hitabo.

Tungod niini, ang Presidente sa Pilipinas mimando sa armadong kusog sa nasud nga hugtan pagbantay ang kalihokan sa mga terorista. Mao usab ang kapolisan. May augmentation force nga gipadala sa Sugbu aron makabantay batok sa bisan unsang daotang elemento nga magtinguha paglawgaw sa nagsingabot nga ASTO Summit.

Sa kaugalingong imbestigasyon ni Rey Corpuz, nasayran niya nga gawas sa teroristang grupo nga nagtinguha paglawgaw sa ASTO Summit, daghan diay usab ang mga politiko na mipadayag og pagsupak nga sa Sugbu ipahigayon ang summit. Gusto nilang sa Manila -- nga maoy ulohan sa Pilipinas -- ipahigayon ang ASTO Summit.

Apan ang Presidente nakasanong na ngadto kang Cong. Jovito Lazaro sa unang distrito sa dakbayan sa Sugbu nga sa Sugbo ipahigayon ang summit. Si Cong. Lazaro usa sa nanghingusog nga sa Sugbu gayod mapahigayon ang summit. -- Sumpayan pa