Dili magapos ang kasingkasing

Misugat dayun kang Fred ang kabugnaw sa aircondition pagsulod niya sa dakong Mall nga nahimutang sa siyudad sa Sugbo. Unya mitan-aw siya sa relo de pulso nga diha sa wala niyang bukton; mag-alas sayis na sa kagabhion.

Mao kining orasa ang gikasabotan nila ni Maricel nga magkita. Adto sila mag-abot sa restaurant nga nahimutang sa ikaduhang andana sa Mall. Kini ang unang higayon nga magkakuyog silang duha. Ang ilang nasabotan mao nga mangaon sa restaurant ug pagkatapos manan-aw og sine. Dugay nang nagkatrato ang duruha apan ning higayona lamang sila magkauban kay matud pa ni Fred, “Hakog ang panahon ning ilang relasyon!”

Paspas nga milakaw si Fred paingon sa restaurant diin nagpaabot na kaniya si Maricel. Ang hinagtok sa iyang mga tunob ginuntan usab sa kusog nga pagpitik sa iyang kasingkasing nga daw buot nang molighot sa gapos niini. Paghitugsad sa iyang mga tiil sa pultahan sa gikasabotan nilang dapit gipangita dayon sa iyang mga mata si Maricel. Ug nakita niya kini nga naglingkod sa kilid nga bahin sa bildo nga bungbong. Nagpahiyom ang dalaga nga mikamay kaniya.

Misulod dayon si Fred. Unya miorder siya'g pagkaon nga igong makapabusog nilang duha. Pagkatapos, milingkod siya sa bakanteng lingkoranan. Human makapanihapon, nanggawas dayon ang duruha ug misulod sa sinehan. Love Story nga salida ang napili nilang tan-awon. Ug nunot sa irog sa mga takna sa sulod sa sinehan, gihimo nila ang una nilang panagromansa nga tugob sa kahidlaw!

“Isulti ko na ang hugot kong desisyon kabahin ning atong relasyon, Mar.” Ni Fred pa samtang mipaduol sa iyang baba ngadto sa dunggan ni Maricel. Medyo may kabanha man god ang salida nga ilang gitan-aw.

“Unsa man kana, Fred?” May sambog nga parayeg ang tingog ni Maricel.

“Kun mosugot ka, adto na ko mopuyo sa giabangan mong boarding house.” Walay pagpanagana nga namulong si Fred. “Mag-ipon na lang ta, Mar, total sakto na man ta'g edad. Bayente sayis anyos ka na ug ako magbayente otso anyos na sab!”

Walay timik si Maricel ug Fred sulod sa taksi nga ilang giluwanan paingon sa gipuy-an sa dalaga. Gihasol karon sa kalibog si Maricel niining sugyot ni Fred kaniya. Taudtaod gayod ang pagpakahilom sa duruha hangtod nga miabot sila sa boarding house. Lumad nga taga-Mindanao kini si Maricel nga mianhi dinhi sa Sugbo ug dinhi nagtrabaho. Nag-abang siya'g boarding house nga siya lamang ang nagpuyo. Samtang si Fred lumad gayod nga taga-Sugbo.

“May gapos ka na, Fred, ug dili na mahimong maangkon ko sa dayon!” Dihay lusok sa luha nga migimaw sa mga mata ni Maricel samtang namulong.

“O, angkonon kong may gapos na ko kay nakasal na kang Lani. Apan nasayod ka na sa hinungdan ngano nga nagpakasal ko niya, Mar.” Nangamuyo si Fred, “Usbon ko, wala ko gugma kang Lani. Ang akong panghilabot sa iyang pagkababaye nga miresulta ning iya karong pagsabak usa ko lang ka panimalos ngadto sa iyang mga ginikanan ug igsuon. Gipakasama ko nila nga usa ka iro nga pakanaugon ug lambahan lang nila sa pultahan sa matag higayon nga mobutho ko sa ilang balay. I-Ikaw ang matuod kong gihigugma, Mar!”

Naamang si Maricel human mabati ang mga pulong ni Fred nga daw milukmay kaniya. Unya namatngonan ni Maricel nga migakos si Fred kaniya. Hugot ang mga gakos ni Fred kang Maricel nga maoy nakaaghat sa dalaga sa pagbalos. Ug dihadiha milumpayat ang kahiladman ni Fred sa tumang kalipay kay ning higayona iyang naamgohan nga bisan ginapos na siya sa bugkos sa kaminyuon gawasnon pa diay ang iyang kasingkasing nga mangita sa matuod nga gugma ug dili ang pag-antos sa kaminyuon nga wala sa iyang kagustohan! (Kataposan)