Oras mo na, Rey Corpuz!

Wala na mohinayon sa pagpanuroy sila si Rey ug Althea. Nawad-an sila'g gana sa pagpanuroy gumika sa dautang hitabo nga ilang nasaksihan sa ilang pagpaingon sa mall nga ila untang siyapingan.

Nakahukom silang mamalik na lang ngadto sa gipuy-an ni Althea. Sa ilang pag-abot, nanulod dayon sila sa lawak sa dalaga. Didto, mainiton nilang gitagay ang matam-is nga dugos sa lawasnong kalipay.

Matagbawon silang nahugno gikan sa makutas nga kombate sa ibabaw sa kama sa dihang nagkadungan sila'g sangko sa kinapungkayan sa himaya.

“Palin visit lang ba ang pag-anhi mo karon sa Cebu o may laing misyon ka na usab?” Gipangutana si Rey ni Althea human sa mabulokon nilang panagsalo sa lawasnong kalipay.

“Misyon, Althea,” nagkanayon si Rey. “Misyon ang hinungdan sa akong pag-anhi sa Sugbo. Ug it is my toughest mission ever.”

“Bahin sa unsa ang maong misyon?”

“May kalabotan kini sa nagsingabot nga ASTO Summit.”

“U-unsa?”

“Akoy gisangonan sa pagdakop kang Abaddon, ang lider sa teroristang grupo nga gikatahong nia na sa Sugbo aron paglawgaw sa ASTO Summit.”

“My God!”

“Kadtong gikaengkwentro namo kaganina, posibleng mga sakop kadto ni Abaddon. Segon sa intelligence report nga nadawat sa 9mm, pulos magsul-ob og turban ang iyang mga sakop sa higayon nga mangatake sila. Ug posibleng ilang mga kauban ang nagsakay sa private plane nga mibangga sa Bouseit Hotel.”

Mibangon si Rey ug nag-ilis.

“Molakaw ka na ba?” Nangutana si Althea.

“Oo,” tubag ni Rey. “Kinahanglang mobalik ko didto sa crime scene. Gihatod ko lang ka dinhi aron pagsegurong luwas ka sa kakuyaw.”

“Kanus-a ta magkita pag-usab?”

“Manawag lang unya ko nimo.”

“Sige. Magpaabot ko.”

Mibiya dayon si Rey sa gipuy-an ni Althea. Mibalik siya ngadto sa dapit nga nahimutangan sa nagun-ob nga Bouseit Hotel. Gusto siyang maghimo'g pakisusi mahitungod sa maong mangilngig nga hitabo. (Sumpayan pa)