First impression

Motuo ka ba sa love at first sight, Dili? Giingnan ni Rico si Donna samtang sila nag-akmoy sa barandilyas sa barko nga ilang gisakyan ug naglantaw sa lapad nga lawod. Ngano man diay, Rico? Misumbalik pagpangutana si Donna kaniya. “Tungod kay mao kana ang akong gibati nganha kanimo,” ni Roco pa. “Bisan karon lang kita nagkaila apan gaan kaayo ang akong buot nganha kanimo. Nasuta ko na lang nga nahigugma na diay ako kanimo.”

“Tingalig nakalitan ka lang, Rico?” sukit ni Donna.

“Dili kana mahitabo,” matud ni Rico. “Nakaseguro ko sa akong kaugalingon nga gihigugma ko ikaw.”

“Hatagi una ko'g panahon sa paghunahuna sa imong gisulti, Rico. Sa dili pa modunggo kining barko nga atong gisakyan sa puerto sa Manila, masayran mo na ang akong tubag.”

Tungod sa sabot nila ni Matet, iyang hinigugma, si Rico nakahukom nga manimpalad sa Manila. Nagkasabot na man god sila nga magminyo. Mao nga midesisyon si Rico nga manarbaho sa Manila agi'g pangandam sa umaabot nilang kaminyoon.

Apan sa pagsakay ni Rico sa Superferry 18 paingon sa kaulohan, gikahimamat niya si Donna. Nadani siya sa kaanyag ni Donna. Nakalimtan niya si Matet nga nahabilin sa ilang dapit sa dihang gikaila niya si Donna. Gihalaran dayon niya kini sa iyang gugma.

Tuod man, sa wala pa modunggo ang barko nga ilang gisakyan sa dunggoan sa Manila, gisugot na si Rico ni Donna. Labihang lipaya ni Rico. Gihatagan niya si Donna sa iyang cellphone number aron magkontakay sila kanunay.

Sukad niadto, kanunay na silang magpadad-anay og mga text messages. Abtik si Rico nga mo-reply sa mga text ni Donna. Apan dili gayod siya motubag sa mga text nga ipadala ni Matet kaniya.

Nakasulod dayon si Rico og trabaho sa Quezon City. Dako-dako ang iyang suweldo. Sa unang suweldo nga nadawat ni Rico, gi-treat niya si Donna sa usa ka luho nga restaurant sa Cubao. Pagkahuman, nanan-aw sila sa sine.

Usa ka adlaw niana, nakadawat na usab si Rico og text gikan kang Matet. Nangumosta kini kaniya. Wala siya mo-reply sa text niini. Wala nay bili si Matet alang kaniya. Ang iyang kalibotan didto na magtuyok ni Donna.

Nianang pagkahapon human sa trabaho wala modiretso'g pauli si Rico sa iyang gipuy-an. Miadto siya sa SM Megamall kay duna siya'y gustong paliton.

Ambot kun unsang sulagmaa, nakit-an ni Rico si Donna sa sulod sa mall. Wala makahimo si Rico sa pagduol niini. May kuyog kining lalaki. Malipayon ang duha nga nangaon sa usa ka outlet sa KFC.

Gipanid-an lang ni Rico ang duha. Gibati na niya ang tuman nga pangabubho. Wala madugay nanindog ang duha ug nanggawas sa kan-anan. Nagkuptanay sila sa kamot. Unya gihagkan sa lalaki ang ngabil ni Donna sa dayon nilang pagbulag og dalan.

Ang nakita ni Rico igo nang nagmatuod nga dili seryoso si Donna sa ilang relasyon.

“Dili diay tinuod ang giingon nga first impression lasts,” bagulbol ni Rico sa hilom.

Ug mao na lamay iyang naamgohan nga mikitoy ang iyang tudlo pagtuplok sa keypad sa iyang cellphone. Kalit man god misantop sa iyang hunahuna nga i-text niya si Matet. (Kataposan)