Room for rent

Gula 86

Akong nasayran nga ang kahangol sa unod maoy hinungdan sa kamatayon ni Bernie. Ang nakapatay niya mao ang bana sa iyang kabit. Nasakpan sila niini sa akto nga nagdula og kalayo. Gipusil si Bernie sa bana sa iyang kerida ug dihadiha namatay sulod mismo sa balay sa babaye.

Namauli dayon mi si Denver sa Surigao aron pagtambong sa haya ni Bernie. Human ikalubong ang akong igsuon, midesisyon si Denver nga mamalik na mi sa Sugbu. Apan nagdumili ko.

“Di na ko mobalik didto kun di ka mosugot nga mamalhin tag puyo,” giingnan ko siya. “Wa na ko ganahi sa mga tawo didtong dapita. Samok. Mga tsismoso ug tsismosa.”

Nakatugkad tingali si Denver nga dili na ako komportable sa pagpuyo didto sa Mabolo, misugot siya nga mamalhin mi’g puyo.

Dihang nakabalik na mi sa Sugbu, nangita dayon mi’g balay nga kapuy-an. Maayo gani kay gibuligan mis higayon. Nakakita mi’g balay nga adunay room for rent sa barangay Day-as. Namalhin dayon mi’g puyo sa maong balay.

Sa unang gabii sa among pagpuyo sa balay nga among gibalhinan, mora sab mi’g bag-ong minyo si Denver. Among gisaulog ang karaang ritwal sa magtiayon. Tugob sa kainit nga among gisaw-an ang lawasnong kalipay.

Buyna-mano kuno! Palihi, matud pa ni Denver. Aron malihian nga mabulokon ug malipayon ang among pagpuyo sa maong balay.

Sa akong bahin, mora ko’g naibtan og tunok nga nahilayo na gyud ko sa Mabolo. Nakalingkawas na gyud ko sa akong problema bahin nila ni Albert ug Sir Mateo Rambaud. Nanghinaot kong dili na nila matultolan ang dapit nga gibalhinan pagpuyo namo ni Denver. Wala man mi motug-an nila’g klaro kun hain mi namalhin. Gusto kong makalikay na sa hingpit sa tentasyon sa unodnong kalipay. Naleksiyon kos nahitabo ni Bernie!

Suwerte ko kay wala gyud ko masakpi sa akong bana sa akong pagluib sa among kaminyoon. Pero kun makakita ko’g tukmang higayon, ikompisal ko ngadto kang Denver ang nahimo kong kasal-anan ngadto kaniya aron mawagtang na ang guilt sa akong kasingkasing ug tanlag.

Hinuon kun dili motugot ang kahigayonan nga ikabutyag ko ngadto kang Denver ang akong kasal-anan, sa Dios na lang ko mangayo’g pasaylo sa tanan kong nabuhat. Mamawi na lang ko ngadto kang Denver pinaagi sa pagsilbi ug paghigugma kaniya sa tibuok kong kinabuhi -- hangtod nga ang kamatayon maoy mopahimulag namo sa usa’g-usa. -- Kataposan