Gula 85
Sa matag higayon nga gusto ni Sir Mateo Rambaud nga mopahimulos sa akong pagka-babaye ug unya mopakita ko’g pagtutol o pagbalibad, modayon gyud siya’g panghulga nako.
“Ibutyag nako ngadto ni Denver ang imong sekreto,” maoy dali niyang litokon. “Nahibawo ra ba ko nga dugay na nimong gitonto ang imong bana.”
Molubad dayon ang akong pagsupak sa gustong buhaton ni Sir Mateo nako sa higayon nga makadungog na ako sa maong bahad.
Maong kanunay gyud molampos si Sir Mateo sa iyang tuyo nako. Nakapahimulos siya sa akong lawas sa dakong kasayon.
Dihay kausa, misulod si Sir Mateo sa akong lawak nga hubog. Hapon kadto. Wala niadtong higayona si Albert kay mibakasyon siya sa ilang probinsiya sa Negros Oriental. Si Denver sab wala pa mahiuli. Natrapik tingali labina kay mikalit lang pagbundak ang ulan ug naglunop ang tubig sa kadalanan sa lainlaing dapit sa dakbayan sa Sugbu.
Gusto ni Sir Mateo nga morabadang nako. Apan gibalibaran ko siya kay puwerte niyang huboga. Ambot kun diin makapalag og inom ang panuway!
“Dili ko,” giingnan ko siya uban ang paglugnot dihang iya kong gigakos. “Dili ko!”
Apan gitionan ko niya sa iyang armas. Gitugkan ko’g kalisang maong mipaundayon na lang ko sa iyang gusto.
“Samtang di pa ko pul-an nimo, Phoebe,” ni Sir Mateo pa, “kinahanglang dili gyud ko nimo balibaran kun dili ka gustong mawagtang sa hingpit ang kalinaw sa imong kinabuhi.”
Ug mitapuko siya kanako. Tugob sa kahangol siyang mipahimulos sa pagsiphod sa kalalim nga gidul-it sa akong lawas ngadto kaniya. Mikurog ang iyang lawas sa dihang nakapabuto na siya.
Migawas dayon si Sir Mateo sa lawak nga akong nahimutangan. Kutob lang ko sa paghilak. Wala koy kasumbongan sa gibuhat ni Sir Mateo kanako. Kay dili ko man ikatug-an ngadto ni bisan kinsa ang lintunganay’ng hinungdan sa tanang kamiserable nga midangat sa akong kinabuhi. Ako ra sab ang mabasol ning tanan kay nagpaulipon man ka sa kahangol sa unodnong kalipay.
Wala ko masayod kun hangtod kanus-a ang pagpahimulos ni Sir Mateo sa higayon -- sa iyang pag-angkon sa akong pag-kababaye! Sa matag higayon nga hidlawon siya sa akong katam-is!
Unya, usa ka higayon niana, nakadawat ko’g text gikan sa Surigao. Gipahibalo ko nga gipatay ang akong igsuon, si Bernie! -- Taposon sunod gula