Room for rent

Gula 83

Giangkon gayod ni Sir Mateo Rambaud sa tumang kahangol ang akong pagka-babaye. Sulod mismo sa lawak nga giokupahan namo ni Denver nagtagbaw siya sa pagpahimulos sa akong lawas.

Gipiyong ko’g hugot ang akong mga mata samtang gikabhan ko ni Sir Mateo, apan dili tungod sa kalalim kundili tungod kay dili ko gustong makakita sa panagway niya samtang nagpalami-lami sa pagsaka-kanaog sa ibabaw sa hubo kong lawas.

Naglagot ko ni Sir Mateo. Sobra ra siya kamapahimuslanon sa higayon. Maisip nang usa ka matang sa pagpangabuso ang iyang gihimo nako. Pero wala ko’y kaisog pagpakgang sa iyang gibuhat bisan wala ko niya gamiti’g kusog sa iyang pag-angkon sa akong pagka-babaye tungod kay may nahuptan man siyang kamatuoran nga makadaot nako sa higayon nga iya kining ibutyag ngadto kang Denver.

Tinuod nga tungod kay ako tawo lamang, miabot usab kanako ang gana sa gibuhat ni Sir Mateo kanako. Apan ang kalalim gisapawan sa nag-alingit kong kalagot ug kasilag kaniya tungod sa iyang kamapahimuslanon.

Human matagbaw sa pagpahimulos sa akong lawas, si Sir Mateo migawas na sa lawak nga akong nahimutangan. Nagpabilin kong naghigda sa kama. Nakahilak ko sa kapungot. Naglagot ko’g maayo!

Pag-abot ni Denver nianang pagkahapon, subli kong mipadayag kaniya sa akong tinguha nga mamalhin mi’g puyo.

 “Mangita ta’g laing balay nga dunay room for rent,” giingnan ko siya. “Kanang dili dinhi sa Mabolo.”

 “Ngano ba gyud nga gusto ka man nga mobalhin ta’g puyo nga nahiluna na man unta ta dinhi?” Gisukit ko ni Denver.

“Gisamokan na ako dinhi, Denver.”

“Hasol baya kaayo ang pagbalhin-balhin og puyo, Phoebe. Gawas pa, mas gusto nako nga anhi ra ta sa Mabolo kay dili ko layo sa akong gitrabahoan.”

Wala ko motingog. Mora’g dili gyud mosugot si Denver nga mamalhin mi’g puyo labina kay taphaw ra ang akong katarongan. -- Sumpayan pa