Room for Rent

Nagdako lang ang akong hunahuna. Wala koy kaisog sa pagpadayag sa buot nakong isulti ngadto kang Albert. Dili nako ikabungat ang mga pulong nga gusto nakong ipadayag ngadto kaniya.

Nasayod na akong daan nga dili gayod ikahimuot ni Albert ang akong tinguha sa pagputol sa among relasyon. Dili ko gustong masilo siya kanako maong wala na lang gyud nako ihinayon ang akong nahunahunaan.

Naulipon na gyud ko’g maayo sa makabuang nga kaulag. Mas palabihon pa nako nga akong mahan-okan sa tanang problema basta magpadayon lang ang kinawat-kawat nga panagsawo namo ni Albert sa lawasnong kalipay.

Paglabay sa pipila ka gutlo, mitapuko si Albert nako. Gipukaw niya ang akong kahinam pinaagi sa inantigo niyang mga teknik sa foreplay nga epektibo kaayong nakahaling sa akong sexual urge.

Sa laing higayon, gitambayayongan namo pagkatkat ang hagdanan sa ikapitong langit. Nag-udhak mi nga nagdungan pagsangko sa kinapungkayan sa himaya. Natagamtam gayod namo ang hingpit nga katagbawan sa pagtagay sa lawasnong kalipay.

Human maka-score og kaduha, nanggawas na mi sa motel. Si Albert misakay og taxi ug nagpahatod ngadto sa iyang gitrabahoan. Naglakaw lang ko paingon sa Metro Gaisano kay dili man kaayo kini layo gikan sa motel nga gitsek-inan namo ni Albert.

Pagsulod nako sa department store, midiretso ko sa school and office supplies department. Gidumdomnako ang gi-display-han sa pocketbook nga mga nobelang Binisaya. Ginindotan ko sa estorya sa nobelang pocketbook nga Bahandi Sa Gugma nga sinulat ni Uriel Cruz Vallecera maong nangita ko’g laing pocketbooks nga iya gihapon nga sinulat.

Wala ko mapakyas sa akong tuyo. May lain pa gyud diay’ng nobelang pocketbooks nga gisulat ni Uriel Cruz Vallecera. Mipalit ko’g kopya sa laing duha niya ka nobelang pocketbooks nga nag-ulohan og Dili Mamakak Ang Kasingkasing ug Kitang Duha Sa Usa Ka Gugma.

Kay mao ra man kini akong tuyo sa downtown, migawas dayon ko sa Metro Gaisano human makapalit og pocketbooks. Mihapit ko sa outlet sa Jollibee ug mi-order og take out nga mga pagkaon. Maoy akong plano nga sa balay na lang nako kan-a ang gipalit kong mga pagkaon sa Jollibee.

Pag-abot nako sa balay, midiretso ko sa akong lawak. Nag-ilis dayon ko’g sapot nga pangbalay. Unya, dihay akong gikatingad-an. -- Sumpayan pa