Gula 23
Nakakita siya’g maayong alibi. Tinuod man hinuon nga gimingaw siya sa iyang mga ginikanan ug mga igsuon apan dili kini ang matuod nga hinungdan sa iyang paghinuktok. Apan dili niya ikasulti ngadto kang Nang Luding nga si James ang hinungdan kun nganong nagsubo siya karong adlawa.
Tingali’g kataw-an siya ni Nang Luding. Basin uga-ugahon na hinuon siya niini kun dili makasabot sa lintunganay’ng hinungdan sa iyang pag-emote.
“Ingon gyud niana ang atong masinati, Day, kun unang higayon nga mahilayo kita sa atong dapit,” nagkanayon si Nang Luding. “Ako gani kaniadto maghilak man sa tago tungod sa kamingaw. Pero naanad ra man ko sa kadugayan. Ug nakaseguro kong maanad ka ra usab sa kamingaw paglabay sa pipila ka adlaw.”
Nakapanghupaw si Denia. Nahitutok si Nang Luding kaniya. Nakasabot siya nga ingon sa buot basahon sa lagas ang iyang hunahuna.
“Tana, Nang Luding,” giagda niya ang lagas. “Ipadayon na nato ang atong mga bulohaton.”
Ug miuna siya sa pagsulod sa pultahan sa kusina. Nagsunod si Nang Luding kaniya.
Nag-ukon-ukon si Denia nga misulod sa lawak ni James nianang pagkaudto. Naabtan niya si James nga naglingkod sa atubangan sa study table niini ug nagbasa og libro.
“Ikaw man lagi gihapon ang naghatod sa akong pagkaon?” Mihunong sa pagbasa si James ug miatubang kaniya. “Ayaw ko’g ingna nga may gibuhat lang gihapon si Nang Luding?” -- Sumpayan pa