Sayo ka man nga mipaingon sa trabaho mo, Bay Eking? Nakapangutana si Kardo dihang nakita niya si Eking nga nagtaghoytaghoy samtang naglakaw, usa ka gabii niana, agi sa gibantayan niyang tindahan. “Alas diyes pa man ang trabaho mo unya alas otso pa man ron!”
“Sayo ko karon, Bay Kardo, kay gipalakaw ko’g sayo sa akong asawa. Ug abi nimo Bay, nalipay kaayo ko karon kay giatiman na ko sa akong asawa. Kaniadto god, baliwala ra ko niya ug pasagdan lang ko nga moandam sa akong mga kagamitan sa trabaho!” Tuaw ni Eking dayong katawa.
“Basin og dunay hinungdan ngano nga giatiman ka na karon sa imong asawa, Bay Eking.” Tuaw usab ni Kardo nga daw may buot ipasabot. “Gipalakaw pa gyod ka niya og sayo...”
Dili ingon niini si Sita kaniadto. Usa na ka tuig ang ilang panag-ipon ni Eking isip bana ug asawa apan wala pa gayod mahitabo nga giatiman siya ni Sita og sama niining iyang gihimo karon. Gani, mahinumdoman pa man ni Eking ang pulong ni Sita sa matag higayon nga mohangyo siya og tabang niini nga moingon lang nga dili siya bata nga kinahanglan pang atimanon. Apan dili usab mabasol ni Eking si Sita tungod kay nasayod man gayod siya nga walay gugma si Sita kaniya.
Napugos lamang si Sita sa pagpakigminyo kang Eking tungod sa kagustohan sa mga ginikanan ni Sita. Suod man god kaayo ni Eking ang mga ginikanan ni Sita ilabi na ang amahan niini kay gawas nga kauban da sila sa trabaho, si Eking pa gayod ang kanunay’ng motabang sa mga ginikanan ni Sita sa matag higayon nga sila manginahanglan nga dili modawat og bayad.
“K-Kining...Bay Eking, buotan kang pagkahigala busa dili ko buot nga mahigmata ka la’g buntag, “Tuaw ni Kardo sa pinugngan nga tingog, “Pauli sa inyong balay unya sa dili pa mag-alas onse sa gabii!”
Nahilom si Eking tapos madungog ang gisulti ni Kardo. Gikulbaan siya. “Nga...nganong mopauli man gyod ko, Bay Kardo?
“Masayran mo ra unya ang hinungdan, Bay Eking. Basta buhata gyod ang giingon ko nimo!” Ni Kardo pa dayong talikod, “Diha ka na kay sirad-an ko na kining tindahan!”
Kusog ang mga lakang ni Eking nga mipauli sa ilang balay. Minus-kinse lang para mag-alas onse sa iyang relo busa gipaspasan niya ang iyang paglakaw. Ug ang kakusog sa hinagtok sa iyang mga tunob ginuntan usab sa sagunson nga pagpitik sa iyang kasingkasing gumikan sa dili tiaw nga kakulba.
Pipila ka gutlo ang milabay ug nahiabot na siya sa ilang balay. Nagsiga pa ang sugang dagitabnon sa ilang sala busa milipot siya sa luyong bahin niini diin nagbarog ang daghang punoan sa saging-gardaba nga maoy usa sa nakahatag og kangiob sa ilang luyo. Unya nabati niya ang agulo ug agutnga nga nagagikan sa ilang kusina. Abli og diyotay ang pultahan sa kusina busa iya kining gilili. Ug nasawod sa iyang panan-aw ang hubo nga lawas sa duha ka binuhat nga nag-akobay samtang nadan-agan sa kahayag sa suga sa sala nga milusot sa nipis nga kortina.
Unya ang agulo ug agutnga sa duha ka binuhat napulihan sa daghong sa kamatayon dihang mitaop ang sundang diha sa bukobuko sa lalaki nga milapos ngadto sa dughan sa babaye nga miluib kaniya! (Kataposan)