Room for rent

 Gula 75

Mipahiyom si Sir Mateo Rambaud pagkakita niya kanako. Nakamatikod ko nga may gibitbit siyang tubo sa flourescent.

“Maayong buntag,” mitimbaya siya.

“Maayong buntag sab,” mitubag ko. “U-unsay ato?”

“Ako untang ilisdan ang suga sa inyong kuwarto. Puydeng mosulod?”

“Wa pa man maponder ang suga sa among kuwarto.”

“Bisan na. Mas maayong mailisan na kana. Dugay na sab nang sugaa. Di na lang nato huwaton nga maponder ug ayha pa ilisdi.”

Wala na lang ko magdaghan og kuti-kuti. Tag-iya gud si Sir Mateo sa balay. Tingalig concern lang siya sa among pag-abang og kuwarto sa iyang balay. Basin og dili siya gustong mahasol kami sa higayon nga maponder na ang suga sa among kuwarto.

Gipasulod nako si Sir Mateo sa kuwarto. Milirawliraw ang iyang mga mata sa palibot sa kuwarto dihang nakasulod na siya. Apan wala ko lang hatagi’g dakong pagtagad ang kakilas sa iyang tinan-awan.

Gikuha ni Sir Mateo ang bangko nga nahimutang duol sa lamesita. Iya kining gipahimutang sa tungod sa suga. Mitungtong siya. Unya gitangtang niya ang tubo sa flourescent. Gitaod niya ang tubo sa flourescent nga iyang dala. Unya mikanaog siya gikan sa gitungtongan nga bangko ug miduol sa kilid sa pultahan diin nahimutang ang switch.

Gi-on niya ang switch. Misiga dayon ang flourescent nga bag-o lang niyang gitaod. Gipalong dayon niya ang suga. Nakamatikod ko nga mora’g nihikap siya sa seradora sa pultahan apan wala ko lang kini hatagi og bug-at nga pagtagad.

“Salamat, Sir,” giingnan ko siya.

“Way sapayan basta ikaw, Phoebe,” nagpahiyom si Sir Mateo samtang namulong sa akong atubangan.

Wala ko moharong dihang mitan-aw siya kanako. Gilainan ko sa iyang tinan-awan. Unya, mora’g kalit lang kong gibati’g kabakikaw nga kami rang duha sulod sa lawak. Gusto kong mogawas na siya.

Wala ko makabantay dihang kalit lang ko niyang gigakos. Gihagkan niya ang akong ngabil. Nagpanglugnot ko sa tinguha nga makalingkawas ko sa hugot kaayo niyang paggakos nako.

“Pasagdi ko,” maguwang sa hagawhaw ang iyang tingog. “Malipay ka lagi sa akong buhaton.” -- Sumpayan pa