Room for rent

Human makaabot sa kinapungkayan sa langit, nangatulog na kami si Denver. Unang nahinanok si Denver kay kanako. Dihang kusog na kaayo ang hagok sa akong bana, inanay sab nga mibug-at ang akong mga tabon-tabon. Hangtod nga mitikyop na kini sa hingpit.

Pagkaugma, dihang nakabiya na si Denver sa balay paingon sa trabaho, midali ko’g sulod sa kuwarto ni Albert. Mi-score mi’g dali-dali aron dili pa siya ma-late sa iyang trabaho.

Tapos sa dinali-dali nga pagtagay sa lawasnong kalipay, gisul-ob dayon nako’g dali-dali ang akong mga sapot. Nag-ilis na sab si Albert aron makagikan na paingon sa iyang trabaho.

Mogawas na unta ko sa lawak ni Albert. Apan dihang ablihan na unta nako ang pultahan sa iyang kuwarto, nakamatikod ko nga may nagtikawtikaw didto sa gawas. Dapit sa may kusina.

Gipakang-a ko’g diyotay ang palid sa pultahan. Milili ko ngadto sa gawas, dapit sa kusina. Maoy akong nakita si Sir Mateo Rambaud, ang tag-iya sa balay. Nagpaso-paso siya sa kusina.

Gihinay nako’g tak-op og balik ang palid sa pultahan. Unya mibalik ko ngadto sa nahimutangan ni Albert.

“Di pa ko makagawas,” maguwang sa hagawhaw ang akong tingog.

“Ngano man?” Usisa ni Albert.

“Naa sa gawas si Sir Mateo. Dapit sa may kusina. Seguradong makit-an ko niya kun mogawas ko kay naatbang man ning imong kuwarto sa kusina.”

“Nag-unsa man si Sir Mateo diha?”

“Ambot lang. Mora’g nagpaso-paso ra man na siya.”

Gitutokan ko ni Albert. Unya mihinay siya’g paduol sa pultahan. Giablihan niya kini’g hinay. Igo lang niyang gipakang-a og diyotay ang pultahan ug milili siya ngadto sa gawas. Miduol ko sa iyang nahimutangan.

“Wa man lagi tawo sa gawas,” ni Albert pa nga milingi nako.

“Tingalig nanaog na sa silong si Sir Mateo,” nako pa.

Naniid si Albert sa gawas. Dihang nasuta niya nga wala nay tawong nagtikaw-tikaw, gipadali ko niya’g pagawas sa iyang lawak. Migawas ko ug midiretso'g sulod sa kuwarto namo ni Denver.

Dihang naudto, may nanuktok sa pultahan sa lawak nga akong nahimutangan. Sa akong pag-abli si Sir Mateo ang akong nakita. -- Sumpayan pa