Si Marko kinsa mas naila sa ngalang Makring ngan nga gimugna sa mga estambay sa ilang lugar. Si Makring nga usa sa mga may pagbati isip usa ka babaye pero nabilanggo sa lawas sa usa ka lalaki.
Gani ilado si Makring sa ilang lugar tungod pud sa baba niini nga kusog kaayo manaway. Samot pa nga dili kini ma-uwaw nga ipakita ang tinuod niyang kinaiya.
"Mga Manash ... mouli sa ko sa among probinsiya," ni Makring pa nga trying hard ug pinababaye nga tingog.
"Maayo pa yads aron walay moguba sa among mood everyday," tubag sa kauban niyang si Mercy nga usa pud ka chixsilog. Tuod man nahiabot si Makring sa terminal ug misakay siya og para Dalaguete nga bus. Pagsaka ni Makring gilibot niya ang iyang panan-aw sa bus kung asa siya molingkod daw mora’g gibayaw siya sa langit sa dihang may bakante nga lingkuranan nga ang tupad usa ka bayong-bayong nga ulitawo ug didto gayud siya milingkod.
Sa wala pa molarga ang bus, nagsugod na si Makring sa pagtinguha ngadto sa katupad niining ulitawo hangtod sa nagdagan na ang bus. Wala pa gani makalayo ang bus dihang nahutdan og estorya si Makring ug migawas ang pagkahinawayon niini.
"Tan-awa nang lalaki nga tigulang nagbarog sa may duol sa pultahan," ni Makring pa nga mitudlo sa lalaki gamit ang iyang simod.
"Asa ana ba?" tubag sa ulitawo.
"Kana gong nakapula og sinina unya upaw ug nagkusmod ang nawong," ni Makring pa nga pwerteng nakatamay sa maong tawo.
Apan nahibulong siya nga wala mokatawa ang ulitawo maong gisamotan niya pagpanaway sa maong tawo.
"Tan-awa sinaw kaayo'g buhok pero mora gihapon og gorilya kay dako kaayo'g dunggan ug ilong," mao gihapon wala mokatawa ang ulitawo ug gipun-an pa gyud ni Makring ang pagpanaway.
"Ay, mao siguro nang gorilya nga naka-eskapo sa zoo nga gibalita ganina parehas gayod og nawong," ni Makring pa nga nibahakhak og katawa.
Unya mitubag ang ulitawo. "Ako nang amahan." Mora’g gisagpa si Makring nga dali kaayong milingi sa pikas. Nangluspad kini ug gipaningot tungod sa kauwaw gani wala na kini maglangas ug magsaba-saba hangtod nga miabot na sila sa terminal sa Dalaguete. (Kataposan)