Nindot ang hangin sa Chinese Temple labi nag hapon. Paborito namong suroyan ni Hayde ang maong lugar. Kun wa kami klase, pananglit sa adlaw nga Domingo, di gyod kami makalimot sa pagsuroy dinhi. Parehas karon, nagtindog kami sa terasa ug naglantaw sa siyudad.
Best friend forever ang pag-ila namo sa usag usa. Unsaon, friend kami sukad pa sa among pagka bata, silingan man gud kami sa Mabolo. Karon nga college na kami, misamot ang among kasuod.
"Gidudahan ta sa atong eskuylahan nga usa kuno nato tomboy."
Mitukikig katawa si Hayde nga mitan-aw nako. Nakakatawa kog kusog nga mitan-aw sab niya.
"Nakadungog sab ko ana," matud ko. "Unsaon, hapit di ta magbuwag. Kanunay ta nilang nakita nga mag-uban."
Nahunong ang among panagsulti dihang usa ka lalaki, parehas namo’g edad ni Hayde, ang miduol namo.
"Kanunay kong magsuroyan dinhi, mga girls. Kanunay ko sab kamong makitang duha dinhi."
Sa tan-aw nako, mahigalaon ang lalaki. Mao sab tingali kini ang pagtuo ni Hayde, kay parehas man kaming mapahiyomon kaniya. Dasig ang hitsura sa lalaki. Guwapo, may hustong gitas-on ug macho.
"Mao ba." Ako ang mitubag.
"Parehas diay tang tulo, paborito ang mingaw nga lugar ug bugnaw nga hangin."
Gitubag sab ni Hayde ang lalaki. Unya nagpaila siya namo. Gerry ang iyang ngalan. Nagtungha sa UC. Gitug-anan sab namo ni Hayde si Gerry sa among ngalan ug sa unibersidad nga among gieskuylahan.
Mao kadto ang sinugdanan. Nahimo namong friend ni Hayde si Gerry. Kanunay kaming magkitang tulo sa Chinese Temple sa Beverly Hills. Naghinatagay sa numero sa among selpon. Among nasayran ni Hayde nga taga Negros si Gerry. Anak og adunahan maong naka-afford ang iyang parents sa pagpatungha kaniya dinhi sa Cebu. Usa ka apartment ang iyang gipuy-an sa siyudad.
"Love nimo si Gerry?" Naiknat ang akong kilay sa gisulti ni Hayde.
"Yes. For the first time in my life, na-inlove ko, Sharma."
Seryoso si Hayde sa akong tan-aw. Parehas kaming duha. Wa pa makasuway og trato sukad sa among pagka dalaga. Ug karon, parehas sab kaming nagmahal sa usa ka lalaki.
"Love sab siya nako, Hayde." Giprangkahan ko ang akong friend sa tinuod kong feeling.
"Aw, sagdi lang god. Basta, promise, best friend forever ta bisan unsay mahitabo."
"Sure, uy. Best friend forever gyod ta."
Usa ka Domingo, nanuroy na sab kami si Hayde sa Chinese Temple. Nahiabot si Gerry nga dunay kaubang babaye nga parehas namog edad. Miduol sila namo. Gipaila ni Gerry ang kauban niyang babaye.
"Hayde, Sharma, si Carla, akong girlfriend."
Igo na lang kami sa pagtinan-away si Hayde sa usag usa. Ug dihang kami na lang duha, nagkinataw-anay kami.
"Di diay siya para nato, Sharma."
"Bitaw, da. Di sab mosugot si God nga maungkag ang atong pagka best friend forever tungod lang sa lalaki," matud ko nga mihangad sa langit.
Unya namiya kami si Hayde sa maong lugar nga malipayon. Nawala na sa among hunahuna si Gerry. (Kataposan)