Nagtakoban nga pagbati

Gula 13

Basa ang baga ug itom nga buhok sa ulitawo. Nakapasamot kini sa kaambong ni James. Ingon kini sa nakugang pagkakita kaniya.

“G-good morning,” nangatahoran si Denia.

“Good morning sab,” tubag ni James.

“Sorry nga misulod ko sa imong lawak nga wa ka. Naghatod ko sa imong pamahaw.”

“Okey lang. Ug salamat sa imong paghago.”

Pahiyom ray gikatubag ni Denia sa gisulti ni James. Na-flattered siya sa hilom nga gihatagan niini og kredito ang iyang gihimo. Kun tukion, dili na angay nga magpasalamat kini kaniya. Katungdanan niya isip sulugoon ang pag-alagad sa iyang mga agalon ug sa tanang mga sakop sa banay niini.

Sa gipakitang behavior ni James, natugkad ni Denia nga buotan kini, dili mapahitas-on ug may respeto sa mga kabos nga sama kaniya. Dili ikahibulong kun nganong nahigugma kini kang Jinky Haber bisan dili sila managsama og kahimtang sa kinabuhi.

Hungog nga Jinky, bagulbol ni Denia sa hilom. Naglagot siyang naghunahuna nga giabusahan ni Jinky ang kabuotan ni James. Suwerte unta kaayo ang maong babaye kun nagtinarong pa kini sa relasyon nila ni James.

“Tawgon ko lang unya ikaw kun may isugo ko nimo,” nagkanayon si James nga didto moatubang sa tokador ug gihuping ang mga buhok niini.

Mao pa makaalinggat si Denia nga taudtaod diay siyang nahitalunang ug naunlod sa lawom nga pagpalandong. “Oo, Sir,” niya pa dayong lakaw paingon sa pultahan. -- Sumpayan pa