Kagawasan sa kaakohan

Sayo nga mibangon si Daisy. Naglung-ag siya. Ug samtang naghuwat nga maluto ang kan-on, naligo siya sa banyo nga nahimutang sa silong sa duha ka andanang apartment nga ilang giabangan sa siyudad. Human maligo, ug pagkaluto sa kan-on, nagmantika siya’g isda nga gikan sa refrigerator. Nag-scramble egg sab siya.

Dihang naandam na ang pamahaw, misulod siya sa ilang lawak ni Art. Nagmata na ang iyang bana ug naglingkod sa wheelchair.

"Mangaon na ta, Art." Dayon siyang tulod sa wheelchair pagawas sa lawak.

Giagak ni Daisy ang bana sa pagpalingkod sa silya sa lamesa kan-anan. Sa atbang naglingkod si Daisy.

"Wa ka ba kapoyi sa pag-atiman nako, Daisy? Nakalimtan mo na ang kaugalingon mong kalipay." Subo ang nawong ni Art. Duha ka tuig na siyang paralitiko tungod sa usa ka aksidente sa gisakyan niyang dyip.

Way trabaho si Art sa pagkaminyo nila ni Daisy. Naningkamot siya. Nangitag trabaho. Apan nabangga sa ten wheeler truck ang depasaheroang dyip nga iyang gisakyan nga maoy hinungdan sa iyang pagkabakol.

Nag-abang silag karaang apartment sa siyudad. Ug si Daisy ang naningkamot aron sila mabuhi. Usa ka teller sa banko si Daisy. Nakahuman siya sa komersiyo. Wa silay anak ni Art.

"May kaakohan ko nimo, Art. Di ko kini katalikdan."

"Apan di na ko makahatag nimog kalipay. Di na ko makatabang nimo sa pagpangitag kuwarta alang sa atong pagpakabuhi."

"Gikasal kita sa atubangan sa pari, Art. Nagpanumpaay kita nga mag-inunongay sa kalipay ug kasakit." Nagpakalig-on si Daisy. Di siya buot nga dag-on sa kahuyang.

"May katungod ka nga magmalipayon, Daisy. Mahimo mo akong biyaan."

"Sa ingon nianang imong sitwasyon? Di, Art. Unongan tika." Kahilakon si Daisy apan gipugngan niya ang iyang kaugalingon. "Sige, kaon na."

Binlan lang og pagkaon para sa paniudto si Art ni Daisy sa sulod sa ilang lawak. May pitsel sab sa tubig ug baso. Wa silay katabang. Di na makaigo ang suweldo ni Daisy kun magkuha pa siya og sulugoon.

May mga gabii nga dugay makatulog si Daisy. May nangulitawo kaniya nga kauban niya sa trabaho. Matahom siya ug 27 pa ang edad. Kun buot hunahunaon, di pa siya matawag nga tigulang. Ipokrita siya kun di niya angkunon nga magpangita sab siya sa lawasnon panginahanglan labi na sa panahon sa kagabhion.

Apan kanunay siyang nag-ampo nga di madala sa kahuyang, nga lig-unon kanunay sa Diyos ang iyang kaugalingon. Minyo siya. Buhi pa ang iyang bana. Di siya makahimo sa pagluib niini.

Usa ka gabii, nahigmata si Daisy sa kusog nga pag-agulo ni Art. Naglisod kini sa pagginhawa. Gidali pagdala ni Daisy sa ospital si Art. Apan namatay gyod kini. Atake sa kasingkasing.

Pipila ka lusok sa mga luha ang natagak sa mga mata ni Daisy sa paglubong kang Art. Miginhawa siya’g lawom. Nabatyagan niya nga miluag ang iyang dughan.

"Adiyos, Art. Adiyos!" Hilom nga nakatuaw si Daisy.

Pagbiya niya sa sementeryo, nakabatyag siya nga daghang mga tunok ang nangaibot sa iyang dughan. (Kataposan)