Room for rent

Gula 69

Gi-imagine nako samtang nag-atubang mi si Albert sa sulod sa kuwarto nga wala mi kalainan nila ni Adan ug Eva didto sa paraiso niadtong unang kapanahonan.

Gikawhat ni Albert ang tuo kong kamot ug gihinay ko niya’g bitad paduol kaniya. Mipasagnunot ko sama sa usa ka kabaw nga may busal ang ilong. Gigakos dayon ko ni Albert ug gihagkan ang akong ngabil.

Samtang nag-ukob ang among mga ngabil nga nagtigi sa pagsupsop sa dugam-is sa lawasnong kahigwaos, gigiyahan ko ni Albert paingon sa kama. Wala gayod mag-ukang ang among mga ngabil samtang gipahigda ko niya. Napahayang ko sa ibabaw sa kama.

Gidaitlan niya sa mga pinatidlom nga halok ang akong ngabil. Mikuri ang kugihan niyang mga kamot sa pagpanghinol sa sensitibong mga parte sa akong lawas. Kun usa pa ka piyano ang akong lawas, si Albert maoy hanas nga piyanista nga eksperto kaayog mga kamot nga mihinol sa mga tekla niini aron pagmugna og hawot kaayong musika.

Mora’g gitabyog ko sa pagduyan sa sonata nga namugna sa paghimas ni Albert sa tanang sensitibong mga parte sa akong lawas. Ingon sa gibayaw ko ngadto sa langit ug nagpautaw-utaw uban sa mga panganod. Ang sensasyon nga akong nasinati sama sa hapuhap sa gamhanang mga kamot nga mihupay sa tanang kagil-as nga sa makadiyot mihakop kanako.

 Unya, ang kalalim sa gihimong foreplay ni Albert milubad ngadto sa talagsaong kahinam. Kanang kahinam nga mora’g dili kabalibaran. Kanang kahinam nga makapasalimuang. Kahinam nga nagpangitag katagbawan. Kahinam nga nangandoy og kahingpitan sa himaya. Kahinam nga apurado. Kahinam nga ingon sa nagpanikad aron hingpiton ang nasugdan nang ritwal sa sulondong buhat sa matag lalaki ug babaye nga nagkasinabtanay ang kabubut-on.

Dihang ingon sa naghingutas na ako sa kahinam, wala na ako makaantos. Giapura na nako si Albert sa paghimo sa ultimatum. Ang penetration.

“Sige na,” matud ko nga naghangos. “Mona’s akong ginhawa.”

Si Albert misanong dayon sa akong hagit.  -- Sumpayan pa